कालिका, २५ साउन

चितवनमा गुरूङ भाषाको चलचित्र मैंरिमो (मिस यु)को प्रिमियर शो हुने भएको छ । गुरूङ भाषामै निर्माण भएको चलचित्र ‘मैरिमो’ अमेरिकाका विभिन्न शहरहरूमा प्रदर्शन भएपछि नेपालमै पहिलो पटक चितवनमा प्रिमियर शो हुन लागेको हो । तमू प्ये ल्हू संघ जिल्ला कार्य समिति चितवनले गणेश चलचित्र मन्दिर नारायणगढमा चलचित्रको प्रिमियर शो गर्न लागेको हो । प्रिमियर शोका लागि सम्पूर्ण तयारी सकिएको आयोजकले जनाएको छ ।

यही साउन ३० गते नारायणगढको गणेश चलचित्र मन्दिरमा चलचित्रको प्रिमियर शो गर्न लागेको हो । टिकट बिक्री गरेर प्रिमियर शोको खर्च कटाएर बाँकी रहेको रकम प्ये ल्हू संघको विकासमा खर्च गरिने प्ये ल्हू संघले जनाएको छ । चलचित्र प्रिमियर शोको लागि तमू प्ये ल्हू संघ जिल्ला समिति चितवनले करिब दुईहजारभन्दा बढी टिकट बिक्री गरिसकेको तमू प्ये ल्हू संघ चितवनका अध्यक्ष जगतबहादुर टु क्ल्हेप्री तमूले जानकारी दिए । आफ्नै भाषा सँस्कृतिको संरक्षण गर्ने गरि चलचित्र निर्माण गरिएकोले चलचित्र प्रिमियर शोको जिम्मा लिएको उनले बताए ।

चलचित्र विशुद्ध सामाजिक कथामा बनेको निर्देशक भोजबहादुर गुरूङले बताए । ‘चलचित्र विशुद्ध रूपमा सामाजिक कथावस्तुमा निर्माण भएको छ,’ निर्देशक गुरूङले भने, ‘जुन धेरै समयपछि गुरूङ भाषामा निर्माण भएको चलचित्र हो । त्यसैले पनि यो चलचित्र आग्र्यानिक चलचित्र हो ।’ मुनाल फिल्मको ब्यानरमा निर्माण भएको गुरूङ भाषाको चलचित्र ‘मैरिमो’ चौथो हो । यसअघि संै ‘न्होर्बे म्रुस्योँ’, (मनकी रानी), ङै ङ्हो (मेरो भाग्य) र आक्रोदो (नरूनु)लगायतका सफल चलचित्रहरू निर्माण भइसकेका छन् । गुरूङ समुदायको यो चलचित्र बहुप्रतिक्षित चलचित्र हो । चलचित्रको शीर्षगीत ‘ए ङोल्स्यो ए ङल्स्यो’ धेरैले रूचाइएको गीत हो ।

आयोजक समितिकाअनुसार ३० गते बिहान ८ः३० बजे र १२ बजे गरी दुई शो चल्ने छ । यसअघि पनि दर्शकहरूको अत्यधिक माग भएकोले २९ गते बिहान ८ः३० बजे क्युएफएक्स जलमा हलमा भिआइपी शो हुने पनि आयोजकले जनाएको छ ।

अधिकांश दृश्य लम्जुङ र केही दृश्यहरू कास्कीमा छायांकन गरिएको चलचित्रको प्रिमियर शोबाट खर्च कटाएर बचेको रकम तमू प्ये ल्हू संघको व्यवस्थापनमा खर्च गरिने कार्यक्रम संयोजक तथा चलचित्रका गायक तथा कलाकार अमिर गुरूङले जानकारी दिए ।

चलचित्रका मुख्य नायक÷नायिका प्रेम गुरूङ र सपना गुरूङले लगानी गरेको चलचित्र ‘मैंरिमो’मा प्रेम र सपनासँगै गुरूङ चलचित्रका सदावहार नायक गमन घले, अमिर गुरूङ, सेसुबा गुरूङलगायतको मुख्य भूमिका रहेको छ । रोशन गुरूङको पटकथा र संवाद रहेको चलचित्रको कथा भने केयरसिंह गुरूङले लेखेका हुन् । बालकाशी गुरूङ कार्यकारी निर्माता रहेको चलचित्रमा पत्रकार आश गुरूङ, अमिर गुरूङ र प्रेम गुरूङको शब्दमा तेजेन्द्र गुरूङले संगीत भरेका छन् । नेत्र गुरूङको नृत्य निर्देशन रहेको चलचित्रमा खिमबहादुर गुरूङको छायांकन र सम्पादन रहेको छ । 

करिब २० लाख रूपैयाँको लगानीमा निर्माण भएको चलचित्र ‘मैंरिमो’ चितवनपछि भदौमा गुरूङ चलचित्रको राजधानी पोखरामा प्रदर्शन गर्ने तयारी भइरहेको चलचित्र युनिटले जनाएको छ । पोखरामा गुरूङहरूको बाहुल्यता रहेकोले हलमै प्रदर्शनबाटै ल्याउने तयारी भइरहेको चलचित्रका निर्देशक भोजबहादुर गुरूङले जानकारी दिए । मुलुकबाहिरको प्रदर्शनबाट दर्शकहरूको राम्रो साथ पाएकोले स्वदेशमा पनि त्योभन्दा बढी साथ पाउनेमा आफूहरू ढुक्क रहेको उनको दावी छ ।