सुर्खेत, १४ साउन । प्रदर्शनीयोग्य पर्यटकीय आकर्षणका वस्तु नहुँदा वीरेन्द्रनगरस्थित क्षेत्रीय संग्रहालय ओझेलमा परेको छ । 

 

एकातिर उचित प्रचारप्रसार अभाव र अर्कोतिर प्रदर्शनीयोग्य साम्रगी नहुँदा आन्तरिक पर्यटकले मात्र अवलोकन गर्ने गरेका छन् । यही कारण मध्यपश्चिमको एकमात्र संग्रहालय अवलोकन गर्नेको संख्या निकै न्यून छ । संग्रहालयका प्रमुख नवराज अधिकारीका अनुसार एक वर्षमा नौ हजार २६२ ले मात्र अवलोकन गरेका छन् । तीमध्ये अधिकांश विद्यार्थी हुन् । 

 

अवलोकनकर्तामध्ये सार्क र तेस्रो मुलुकका पर्यटक अत्यन्तै न्यून छन् । सार्क मुलुकबाट आठ जना मात्र यहाँ आए । यस क्षेत्रका प्राचीन महत्व झल्किने वस्तु संग्रहित गर्नसके पर्यटक बढ्न सक्ने उद्योग वाणिज्य संघका प्रदेश संयोजक पदमबहादुर शाहीले बताउनुभयो । “संग्रहालयको विकास, स्तरोन्नतिका लागि आवश्यक बजेट व्यवस्था गरिनुपर्छ,” उहाँले भन्नुभयो, “नाममात्रको संग्रहालयले पर्यटन प्रवद्र्धन सम्भव छैन ।” संग्रहालयमा सुर्खेत घुम्न आउने बाहिरी जिल्लाका विद्यार्थी नै बढी छन् । गत आवमा चार हजार ६६५ विद्यार्थीले अवलोकन गरेका थिए । 

 

यसलाई विद्यार्थीका लागि अध्ययन केन्द्र बनाउन सकिने उनको सुझाव छ । तथ्याँकअनुसार बाँके, बर्दिया, दाङ, कैलाली, जाजरकोट, दैलेखलगायतका विद्यार्थी बढी आउने गरेका छन् । गत आवमा आगन्तुक शुल्कबाट रु एक लाख तीन हजार ६६ संकलन भएको थियो । आव ०७२÷७३ मा रु एक लाख नौ हजार ९६ राजस्व संकलन भएको थियो । 

 

संग्रहालयले विद्यार्थीका लागि पाँच, सर्वसाधारणका लागि १०, सार्क मुलुकका लागि ५० र सार्कभन्दा बाहिरका नागरिकका लागि रु १०० प्रवेश शुल्क तोकेको छ । 

 

संग्रहालयमा विभिन्न समुदायका वेषभूषा झल्कने पोशाक, गरगहना, पुरातान्त्रिक महत्वका सिक्का, भाँडाकुँडालगायत संग्रहित छन् । रासस