काठमाडौँ, ३० मङ्सिर ।

कलाकारिता क्षेत्रबाट चलचित्र क्षेत्रमा योगदान पु¥याएबापत तीन कलाकारलाई आज ‘हरिततारा चलचित्र पुरस्कार’ प्रदान गरिएको छ । 

 

नायिका करिष्मा मानन्धरलाई ‘हरिततारा चलचित्र पुरस्कार–२०७२’ तथा चलचित्र पत्रकार शान्तिप्रिय र डिजाइनर सुन्दर श्रेष्ठलाई ‘हरिततारा चलचित्र पुरस्कार–२०७३’ बाट पुरस्कृत गरिएको हो । उक्त पुरस्कारको राशी जनही रु २५ हजार रहेको छ । 

 

परिवर्तन नेपालका अध्यक्ष मोहन निरौला, अभिनेत्री वसुन्धरा भुसाल र नायिका भुवन चन्दले संयुक्तरुपमा सो पुरस्कार उहाँहरुलाई प्रदान गर्नुभयो । कला क्षेत्रमा काम गर्ने कलाकारलाई २०५२ सालदेखि सो पुरस्कार प्रदान गरिँदै आइरहेको छ । 

 

यसैगरी ‘दुर्गादेवी पुण्य निरौला चलचित्र स्मृति पुरस्कार’ निर्देशक तथा कलाकार सुभाष गजुरेललाई प्रदान गरिएको छ । रु दस हजार राशीको सो पुरस्कार चलचित्र निर्देशक यादव खरेल र चेतन कार्कीले संयुक्त रुपमा उहाँलाई प्रदान गर्नुभयो । 

 

त्यस्तै परिवर्तन सम्मान–२०७३ बाट कलाकार सविन वास्तोला, सङ्गीतकार सन्तोष श्रेष्ठ र चिकित्सक डा श्यामकाजी महर्जनलाई प्रदान गरिएको छ । 

 

परिवर्तन नेपालले यहाँ आज आयोजना गरेको कार्यक्रममा उहाँहरुलाई सो पुरस्कार तथा सम्मान गरिएको हो । 

 

सो अवसरमा नायिका मानन्धरले पुरस्कारले थप जिम्मेवारी बढाएको भन्दै अझै चलचित्र क्षेत्रमा योगदान पु¥याउने बताउनुभयो । 

 

अभिनेत्री भुसाल तथा चलचित्र निर्देशक कार्की र खरेलले कलाकारलाई पुरस्कार र सम्मानले थप ऊर्जा प्रदान गर्ने भएकाले सरकारले यस क्षेत्रमा लागेकालाई उच्च सम्मान गर्नुपर्नेमा जोड दिनुभयो । रासस