मनोरञ्जन

भुवन केसी भन्छन् ‘चरित्र हत्या गर्ने प्रयास गरियो, होटलको विल नतिरेको कुरा झुटो हो’

गोकुल बानियाँ,
पोखरा १० असार ।

चलचित्र छायाङ्कनको लागि पोखरा बसाईको क्रममा होटलको विल तिर्न नसकेको र निजि कारको साथै छायाङ्कनमा प्रयोग हुने सवारी होटलवालाले नियन्त्रणमा लिएको बिषयमा भुवन केसीले कडा आपत्ती जनाएका छन् ।

उनले आफ्नो सवारी साथै छायाङ्कनको सवारी नियन्त्रणमा लिएको भन्ने खबर सरासर झुट रहेको जिकिर गरे । बिहिवार पोखरामा पत्रकार सम्मेलन गरी आफु बसेको होटलको कम्पाउण्डमा सुरक्षाको लागि निजि कार र छायाङ्कनको गाडि राखिएको र कसैले नियन्त्रणमा नलिएको बताए ।

आफु स्वयं निर्देशक र निर्माता रहेको फिल्म ड्रिम्सको छायाङ्कनका लागि पोखरा आएका केसी सहितको टोली ड्यामसाईड स्थित पिसफुल होटलमा बस्दै आएका थिए । फिल्म युनिट ४० जनाले खाएको र होटलमा बस्दाको झण्डै पाँच लाख रुपैया समयमै नतिरेकाले होटलले केसीको निजि कार र फिल्मको छायाङ्कनमा प्रयोग हुने गाडि नियन्त्रणमा लिएको खबर सार्वजनिक भएको थियो ।

चलचित्र छायाङ्कनको लागि २७ दिन देखि पोखरामा रहेको उल्लेख गर्दै उनले आफ्नो चरित्र हत्या गर्ने प्रयास स्वरुप झुटो प्रचार गरिएको आरोप लगाए । विल तिर्न नसकेर सवारी नियन्त्रणमा लिएको कुरामा कुनै सत्यता नरहेको केसीको दाबि छ । ‘ प्रोजेक्ट सम्पन्न गर्दा लाग्ने सबै खर्च निर्माण नियन्त्रकले हेर्ने गर्छ । अहिले पनि चलचित्र युनिट सोहि होटलमा बसिरहेको छ । ’ उनले भने ।
‘ हामी पोखरामा छौ , होटलको विल नतिरी काठमाण्डौ फर्किएको भए यो सवाल गर्नु ठिक थियो । ’ केसीले थपे ‘ चरित्र हत्या गर्ने उद्देश्यको साथ प्रचार गरियो । ’ चलचित्र ड्रिम्स, आफु मात्रै होईन सिंगो चलचित्र क्षेत्रको चरित्र हत्या गर्ने प्रयास भएको महशुस गरेको उनले बताए ।

होटलको लेटरप्याडमा लेखिएको सञ्चालिका बिन्देश्वरी श्रेष्ठको चिठ्ठी सहित उपस्थित भएका उनले होटलले पनि बाहिर आएको खबरले दुःख ब्यक्त गरेको जानकारी दिए । उनले सार्बजनिक गरेको पत्रमा गाडि नियन्त्रणमा लिएको भन्ने खबर झुटो भएको उल्लेख गरिएको छ ।

ड्रिम्स फिल्म ८७ लाखको प्रोजेक्ट भएपनि निर्माण सम्पन्न गर्दा एक करोड २५ लाख खर्च पुग्ने अनुमान गरिएको उनले सुनाए । कलाकार र अन्य सहयोगीको पारिश्रमिकका बिषयमा उनले तोकिएको काम पुरा भएपछि पारिश्रमिक दिने प्रतिबद्धता जनाए ।

आफ्नै छोरा अनमोल केसीलाई नायकको रुपमा प्रस्तुत गरेका उनले ड्रिम्स फिल्मले पर्यटन प्रबद्र्धन समेत गर्ने जिकिर गरे । उनका अनुसार चलचित्र छायाङ्कनको १५ प्रतिशत काम मात्रै बाकी छ । बाकी छायाङ्कन काठमाण्डौमा पुरा गर्ने केसीले बताए ।