बेइजिङ, २५ वैशाख ।

चिनियाँ राष्ट्रपति सि जिनपिङ शुक्रबार बिहान रसियाको राजधानी मस्को पुग्नुभएको छ । उहाँ रसियाली राष्ट्रपति भ्लादिमिर पुटिनको आमन्त्रणमा रसिया पुग्नुभएको हो । 

 

त्यस भ्रमणका क्रममा उहाँ रसियाली विजय दिवसका अवसरमा आयोजना गरिने विशेष कार्यक्रममा उपस्थित हुनुहुने रसियाली अधिकारीहरुले जानकारी दिएका छन् । 

 

शनिबार रसियाले विजय दिवस मनाउन लागेको छ । सो अवसरमा आमन्त्रण गरिएका विश्वका अन्य देशका नेताहरु पनि त्यहाँ पुग्ने क्रम सुरु भएको छ । 

 

प्राप्त समाचारअनुसार उहाँले मे ८ देखि १० सम्म रसियाको भ्रमण गर्नु हुनेछ । त्यस क्रममा चिनियाँ र रसियाली राष्ट्रपतिबीच पनि भेटवार्ता हुने कार्यक्रम रहेको छ । 

 

यही शनिबार आयोजना गरिएको ७० औँ रसियाली विजय दिवस कार्यक्रममा रसियाले विश्वका कैयौँ नेतालाई आमन्त्रण गरेको छ । तर सो समारोहमा कतिपय पश्चिमा राष्ट्रहरूले भने उपस्थित हुन अस्वीकार गरेका छन् । 

 

उहाँको भ्रमण दलमा चिनियाँ उच्च सरकारी अधिकारीहरूका अतिरिक्त चिनियाँ कम्युनिष्ट पार्टीका उच्चस्तरीय नेताहरूको पनि सहभागिता रहेको छ । 

 

उहाँ काजखस्तानको भ्रमणपछि शुक्रबारै रसियाको राजधानी मस्को पुग्नुभएको जनाइएको छ । चिनियाँ राष्ट्रपति सिले रसियापछि बेलारुसको भ्रमण गर्नुहुने बताइएको छ । 

 

राष्ट्रपति सि यही मे १० देखि १२ सम्म बेलारुस जानुहुने भएको छ । बेलारुसका राष्ट्रपति अलेक्जेन्डर लक्सानेकोको आमन्त्रणमा उहाँले सो देशको भ्रमण गर्न लाग्नुभएको हो । रासस÷सिन्ह्वा