लन्डन, २५ वैशाख ।

बेलायतमा बिहीबार भएको आमनिर्वाचनमा त्यहाँको कन्जरभेटिभ पार्टी सबैभन्दा ठूलो दलका रुपमा रहने निश्चित देखिएको छ । 

 

शुक्रबार प्राप्त पछिल्लो नतिजाअनुसार सो दलले २८२ स्थान हासिल गरेको छ । उसले प्रमुख प्रतिद्वन्द्वी दल लेबर पार्टीभन्दा अहिले नै कम्तीमा पनि ६६ स्थान बढी ल्याइसकेको छ । 

यो समाचार तयार पार्दासम्म सो निर्वाचनका ६४ स्थानको मात्र परिणाम सार्वजनिक गर्न बाँकी रहेको छ । 

 

यसरी हेर्दा उक्त दल नै बेलायती संसद हाउस अफ कमन्समा सबैभन्दा ठूलो दलका रुपमा रहने निश्चित भएको बताइएको छ । 

 

संसदमा स्पष्ट बहुमत हासिल गर्नका लागि ३२६ स्थान प्राप्त गर्नुपर्ने हुन्छ । तर सो दलले आफैले एक्लैले स्पष्ट बहुमत हासिल गर्न सक्ने वा नसक्ने भन्ने बारेमा भने अहिले नै केही भन्न नसकिने बताइएको छ । 

 

सो दल बेलायतका वर्तमान प्रधानमन्त्री डेभिड क्यामरुनको दल हो । क्यामरुनले पनि यस अघि नै आफ्नो दलले विजय हासिल गर्ने धारणा राखिसक्नुभएको छ । रासस÷सिन्ह्वा