तालुकान अफगानिस्तान, २४ वैशाख ।

 

उत्तरी अफगानिस्तानको ताखर प्रान्तमा रहेको तालुकान सहरमा गरिएको कारबाहीका क्रममा कम्तीमा पनि १५ जना तालिवान मारिएका छन् । 

 

अफगानिस्तानको सुरक्षा निकायले गरेको कारबाहीका क्रममा ती तालिवान मारिएको अफगान अधिकारीहरुले जनाएका छन् । उनीहरुकाअनुसार तालिवानको एक समूहले त्यहाँको एक घरमा आक्रमण गर्दा ती तालिवान मारिएका हुन् । 

 

उक्त प्रान्तका गभर्नर हाजिमुल्लाह ओमारको घरमा तालिवानहरुले आक्रमण गरेका थिए । तालिवानको एक समूहले उहाँको घरमा आक्रमण गरेपछि भएको भिडन्तमा ती तालिवान मारिएका समाचारमा जनाइएको छ । 

 

बिहीबार बिहान भएको सो हमलापछि सरकारी सुरक्षा निकायले जवाफी कारबाही गरेको थियो । १५ जना आक्रमणकारी नै मारिएको अर्को एक समाचारमा जनाइएको छ । 

 

मारिनेहरुमा सबैजना तालिवान नै परेको एकजना अफगान अधिकारीले जनाएका छन् । उनकाअनुसार सो निवासमा रहेका एकजना सुरक्षा गार्ड घाइते भएका छन् । 

 

अफगानिस्तानमा पछिल्लो केही समययता तालिवानहरुले आक्रमणलाई जारी राखेको भए पनि सुरक्षा निकायहरुले भने त्यसलाई निस्तेज पार्ने गरेका छन् । रासस÷सिन्ह्वा