बेरुत, १९ वैशाख ।

 सिरियाको उत्तरी एक गाउँमा इस्लामिक स्टेट समूहलाई लक्ष्य बनाइ अमेरिकी नेतृत्वमा गरिएको हवाई आक्रमणमा कम्तीमा ५२ व्यक्तिको मृत्यु भएको जानकारी सिरियन अब्जरभेटरी फर ह्युमन राइट्सले शनिबार दिएको छ । 

 

अब्जरभेटरीका प्रमुख रामी अब्देल रहमानले गठबन्धनले अलेपोको बिरमहलमा गरेको हवाई आक्रमणमा शुक्रबार ५२ नागरिकको मृत्यु भएको जानकारी दिनुभयो । 

 

उहाँले सात बालबालिकाको मृत्यु भएको र १३ अझै पनि भग्नावशेषमा पुरिएको बताउनुभयो । 

 

उहाँले कुर्द लडाकू तथा सिरियाली विद्रोही दुई किलोमिटर पर आईएसका लडाकूसँग सङ्घर्ष गरिरहेको जानकारी दिनभयो । 

 

उहाँले बिरमहलमा नागरिक मात्र बसोबास गर्ने गरेको र त्यहाँ आईएसका विरोधी पनि नरहेको तथा द्वन्द्वपनि नभएको बताउनुभयो । 

 

उहाँले उक्त गाउँमा आईएसका एउटा पनि लडाकूको मृत्यु नभएको बताउनुभयो । उहाँले नजिकैको गाउँमा भएको आक्रमणमा भने कम्तीमा सात जिहादीको मृत्यु भएको उल्लेख गर्नुभयो । 

 

अमेरिकी नेतृत्वमा गठबन्धनले गरेको हवाई आक्रमणले अलेपो प्रान्तमा जिहादीसँग युद्ध गरिरहेको कुर्द लडाकूलाई सहयोग गरेको छ । 

 

यस्ता हवाई आक्रमणको सहयोगका कारण जनवरीमा कुर्द लडाकूले आईएसलाई कोबानेबाट भगाउन सफलता प्राप्त गरेको थियो । 

 

बेलायतमा केन्द्रीय कार्यालय रहेको अब्जरभेटरीले यस हवाई आक्रमणमा कूल दुई हजार व्यक्तिको मृत्यु भएको र त्यसमा एक हजार ९२२ आईएसका लडाकू भएको जानकारी दिएको छ । रासस/एएफपी