लस एन्जलिस, १८ वैशाख । 

इलेक्ट्रिक गाडी विकासमा अग्रणी भूमिका खेल्ने टेल्सा मोटर्सले बिहीबार ‘‘होम ब्याटरी’’ नामक घरेलु उपयोगका लागि ब्याटरी सार्वजनिक गरेको छ र यस संस्थाका प्रमुख एलन मस्कले यस ब्याटरीले विश्वको सम्पूर्ण ऊर्जा संरचनालाई परिवर्तन गरिदिने दाबी गर्नुभएको छ । 

 

टेल्सा पावरवेल नाम गरेको यस ब्याटरीमा ‘सोलार प्यानल’ तथा विद्युत सञ्जालबाट प्राप्त ऊर्जा सङ्कलन गर्नसक्ने व्यवस्था भएको बताइएको छ । यसले विद्युत कटौतीको समयमा सुरक्षित रुपमा विद्युत आपूर्ति गर्नसक्ने बताइएको छ । 

 

सैद्धान्तिक रुपमा यस ब्याटरीलाई गराजको पर्खाल वा घरभित्र राख्न सकिने र यसले सौर्य ऊर्जाबाट सञ्चालित घरलाई परम्परागत विद्युत सञ्जालबाट पूर्णतया स्वतन्त्र बनाउनसक्ने बताइएको छ । 

 

लस एन्जलिसको बाहिरी भागमा रहेको गोदाममा ‘‘पावरवेल’’ सार्वजनिक गरेपछि मस्कले यो ब्याटरी तयार गर्दा विश्वको सम्पूर्ण ऊर्जा संरचनामा परिवर्तन गर्ने उद्देश्य राखिएको बताउनुभयो । साथै उहाँले यो प्रणालीमा कार्बन उत्पादन नहुने बताउनुभयो । 

 

यस यन्त्रको लागत तीन हजार ५०० अमेरिकी डलर रहेको छ र यस वर्ष यो अमेरिकामा बिक्रीमा रहनेछ । अर्को वर्षदेखि यसलाई अन्तर्राष्ट्रिय रुपमा बिक्रीमा राखिने बताइएको छ । 

 

मस्कले यस उत्पादनका लागि जर्मनीलाई प्रमुख बजारको रुपमा लिएको बताइएको छ । छ इन्च मोटो, चार फिट लम्बाइ र तीन फिट चौडाइ रहेको यस उत्पादनले सौर्य ऊर्जालाई उच्च रुपमा लिनसक्ने बताइएको छ । 

 

यो प्रविधि पर्याप्त सौर्य उर्जा भए पनि विद्युतीय ऊर्जा आपूर्ति प्रणाली भरपर्दो नभएको विकासशील क्षेत्रमा पनि यो ठूलो फाइदाको विषय हुने बताइएको छ । मस्कले यो प्रविधि सेलफोन जस्तै व्यापक रूपमा विस्तार हुनसक्ने सम्भावना देख्नुभएको छ । 

 

उहाँले यो विश्वका गरिब समुदायमा ठूलो सहयोगी ऊर्जा आपूर्ति प्रणाली हुने र यसले घरलाई विद्युतीय सञ्जालबाट पृथक बनाउने बताउनुभयो । रासस/एएफपी