मोगादिसु, १५ वैशाख ।

नाइजेरियाको उत्तरपूर्वी सहर दामासाकको एक घरमा दर्जनौँ शव भेटिएका छन् । अज्ञात व्यक्तिका ती शव हत्या गरी सो स्थानमा गाडिएको हुनसक्ने बताइएको छ । 

 

दामासाक सहरमा पाइएका ती शव बोको हरामले हत्या गरिएका व्यक्तिको हुनसक्ने अनुमान गरिएको समाचारमा जनाइएको छ ।

 

उक्त क्षेत्रको एक घरमा र एक स्थानीय नदीमा पनि शवहरू यत्रतत्र छरिएको अवस्थामा पाइएको समाचारमा जनाइएको छ । 

 

गएको शनिबार पनि सो नगरको एक स्थानमा गाडिएको अवस्थामा २० वटा शव भेटिएको थियो । एकजना स्थानीय माहम्मद सादिकले ती शव देखेका थिए । 

 

एक समाचारअनुसार सो स्थानमा गाडिएका र घरभित्र पाइएका गरी कम्तीमा पनि ४०० वटा शव भेटिएका छन् । जसका कारण सो क्षेत्र अत्यन्तै तनावपूर्ण रहेको अधिकारीहरूले जनाएका छन् । 

 

सो क्षेत्र नाइजेरियाको बोर्नो राज्यमा पर्दछ । तर बोर्नो राज्यका अधिकारीहरूले भने ती शवको बारेमा कुनै समाचार नरहेको बताएका छन् । 

 

गएका केही समयदेखि सो क्षेत्रमा बोको हरामको आतङ्क व्यापक बन्दै गएको बताइन्छ । त्यसैले यस हत्यामा पनि उनीहरूकै हात रहेको प्रहरीले जनाएको छ । रासस÷एएफपी