अन्तर्राष्ट्रिय

यमनको आदेनमा भएको सङ्घर्षमा तीन दिनमा एकसट्ठीको मृत्यु

ओदन, १४ चैत । यमनको दक्षिणी भागको प्रमुख नगर आदेनमा सिया विद्रोही तथा लडाकूबीच भएको सङ्घर्षमा कम्तीमा ६१ व्यक्तिको मृत्यु भएको जानकारी एक वरिष्ठ स्वास्थ्य अधिकारीले शनिबार दिएका छन् ।

आदेनका स्वास्थ्य विभागका निर्देशक अल–खेदर लसौरले ६१ व्यक्तिको मृत्यु भएको तथा २०३ व्यक्ति घाइते भएको जानकारी दिनुभयो ।

हाल आदेनमा तनाव निकै बढेको छ । यहाँका हुथी विद्रोहीमाथि साउदी अरेबियाको नेतृत्वमा गठबन्धनले आक्रमण गरिरहेको छ ।

बिहीबार साउदी अरेबियाले हवाई आक्रमण गर्नुपूर्व यहाँबाट दर्जनौँ कूटनीतिज्ञलाई अन्यत्र लगेको थियो । बिहीबार यहाँ विद्रोही माथि आक्रमण आरम्भ भएको थियो ।

साउदी अरेबियाको समाचार संस्था एसपीएले बुधबार ८६ व्यक्तिलाई यहाँबाट अन्यत्र लगिएको जानकारी दिएको छ । रासस÷एएफपी