बागलुङ, १९ चैत ।

 

जिल्ला खेलकुद विकास समिति बागलुङ कर्मचारीविहीन अवस्थामा छ । सरकारी दरबन्दी भएर पनि समितिको कार्यालयमा कर्मचारी छैनन् ।

 

समितिको कार्यालय र दैनिक प्रशासन समितिका सचिवको भरमा चलेको छ । भएका एक नासु पनि २०६४ सालमा कारबाहीमा परेर बाहिरिएपछि दरबन्दीका कर्मचारी कोही छैनन् । 

 

समितिका अनुसार नासु र सहायक लेखापालको सरकारी दरबन्दी समितिमा छ । “एक जना सहयोगीसमेतको व्यवस्था छैन, म आफैँले पनि पत्र बाँड्दै हिँड्नुपर्ने अवस्था छ”, समितिका अध्यक्ष बाबुलाल शाक्यले भन्नुभयो, “कर्मचारी नहुँदा दैनिक प्रशासनिक काम र कार्यालय चलाउन कठिन भएको छ ।” समितिले कार्यालय प्रमुखको जिम्मा समितिका सचिव भीमसेन शाक्यलाई दिएको छ । 

 

जिल्लास्तरमा खेलकुद विकासको महत्वपूर्ण निकाय मानिने खेलकदु विकास समिति कर्मचारीविहीन हुँदा कार्यालयको काम र खेल गतिविधि पनि प्रभावित हुने गरेका छन् । प्राविधिक कर्मचारीका भरमा प्रशासन चलाउनुपर्ने बाध्यता रहेको अध्यक्ष शाक्यले बताउनुभयो । कायम रहेको दरबन्दीमा पनि कर्मचारी व्यवस्था हुन नसक्नु दुर्भाग्यपूर्ण रहेको उहाँको भनाइ छ । रासस