कालिका चैत १० – 

 

जारी विश्वकप क्रिकेटको पहिलो सेमिफाइनलमा न्युजिल्याण्ड र दक्षिण अफ्रिकाबीचको खेल वर्षाका कारण प्रभावित भएको छ । यस अघि न्युजिल्याण्डको अकल्याण्डमा रहेको इडेनपार्क रंगशालामा टस जितेर दक्षिण अफ्रिकाले पहिले ब्याटिङ थालेको हो ।

 

 वर्षाले प्रभावित पार्नु भन्दा अघि दक्षिण अफ्रिकाले ३८ ओभरको समाप्तिमा ३ विकेट गुमाउदै २ सय १६ रन जोडेको छ । फाफ डु प्लेसिस ८२ र एबी डी भिलियर्स ६० रनका साथ नट आउट छन् । यसअघि हासीम अम्ला १० तथा क्वीन्टन डी कक १४ रन बनाउदै ट्रेन्ट बोल्टको बलमा आउट भए । यस्तै रिले रोसौ ३९ रनमा कोरे एण्डरसनको बलमा आउट भए ।

 

न्युजिल्याण्ड यो प्रतियोगिताका ७ खेलमा अपराजित छ भने दक्षिण अफ्रिकाले ७ मध्ये ५ खेल जितेको छ । न्युजिल्याण्ड र दक्षिण अफ्रिका दुवै अहिलेसम्म विश्वकपको फाइनल पुग्न सकेका छैनन् । दक्षिण अफ्रिका नकआउट चरण पार गरेर पहिलोपल्ट सेमिफाइनल पुगेको हो । अघिल्लोे विश्वकपको क्वाटरफाइनलमा न्युजिल्याण्डले दक्षिण अफ्रिकालाई ४९ रनले हराएको थियो ।

 

यस्तै, जारी खेलको कालिका एफ.एमले प्रत्यक्ष प्रसार समेत गरिरहेको छ । खेलको लाइभ स्कोर तपाईले कालिका एफ.एमबाट पनि प्राप्त गर्न सक्नु हुनेछ । जसका लागि मोबाइलको म्यासेज बक्समा गई आई.सी.सी टाइप गरी ४८४८ मा पठाउनु पर्नेछ ।