बागलुङ, ४ जेठ ।

अपाङ्ग र असहाय बालबालिकाको हितमा यहाँका एक व्यक्तिले रु एक करोडबराबरको कोष स्थापना गर्नुभएको छ । 

 

जिल्लाको बिहुँ गाविस घर भई हाल जापानमा व्यवसाय गर्नुहुने दीपक सुवेदीले रु एक करोडको ‘दीपमहल फाउन्डेसन’ स्थापना गर्नुभएको हो । 

 

सुवेदीले बिहँुस्थित त्रिपुरेश्वर महादेव रामकोट मन्दिरमा सङ्कल्प गर्दै कोषको घोषणा गर्नुभएको छ । बालबालिकाको शिक्षा, स्वास्थ्य र अवसरका क्षेत्रमा खर्च हुने गरी कोष खडा गरेको सुवेदीले बताउनुभयो । 

 

“धवलागिरि अञ्चलभित्रका अपाङ्ग, असहाय बालबालिकाको हितमा खर्च गर्ने गरी कोष स्थापना भएको हो” सुवेदीले भन्नुभयो, “प्राकृतिक विपत्तिलगायत अन्य जोखिमबाट बालबालिकालाई मुक्त राख्न र उनीहरुको सुरक्षित भविष्यका लागि काम गर्नेछौँ ।” 

 

उहाँले कोषमा आफू एक्लैले रु करोड राख्ने उल्लेख गर्नुभयो । गाउँको विकास निर्माण र समाजसेवाको क्षेत्रमा सुवेदीले यसअघि पनि सघाउँदै आउनुभएको छ । कोष दुःख र पीडामा परेका बालबालिकाका लागि सहयोगी हुने उहाँको विश्वास छ । “हामी धेरै नेपाली रोजगारको सिलसिलामा विदेशमा छौँ, नेपालीको पीडा र समस्यामा हामीले नै मलम लगाउनुपर्छ”, सुवेदीले भन्नुभयो । 

 

व्यक्तिगतभन्दा कोष बनाएर संस्थागत सहयोग गर्दा दिगो र प्रभावकारी हुने भएकाले सुवेदीमा ‘फाउन्डेसन’ स्थापना गर्ने सोच आएको हो । ‘फाउन्डेसन’ र कोषलाई वैधानिक रुपमा चलाउन छुट्टै स्वतन्त्र समिति गठन गर्ने तयारी भइरहेको जनाइएको छ । रासस