काठमाडौँ, २ जेठ ।

इस्लामी सङ्घ नेपालले भूकम्पले मुख्य रुपमा प्रभाव पारेको १४ जिल्लाका २१ हजार २३१ घरधुरीलाई खाद्यान्न, त्रिपाल तथा अन्य अत्यावश्यकीय सामग्री वितरण गरेको जनाएको छ । 

 

सङ्घले गत वैशाख १३ गतेदेखि नै राहत सामग्री सङ्कलन तथा वितरण गरेको र खोजी तथा उद्धारमा सक्रिय सहभागिता जनाएको बताएको छ । 

 

सङ्घले काठमाडौँ, भक्तपुर, ललितपुर, धादिङ, नुवाकोट, सिन्धुपाल्चोक, काभ्रेपलाञ्चोक, रामेछाप, दोलखा, गोरखा, मकवानपुरमा विशेष गरी चामल, दाल, त्रिपाल, पाल, ब्ल्याङ्केट, चिनी, नुनलगायतका अत्यावश्यकीय सामग्री प्रदान गरेको छ । 

 

सङ्घका अध्यक्ष नजरुल हुसेन फलाहीले आफूहरुले वितरण गरेको खाद्यान्नले चार हप्तासम्म सहज रुपमा उपभोग गर्न पाउने बताउनुभयो । 

 

भूकम्प प्रभावित जिल्लाका विभिन्न स्थानमा निःशुल्क स्वास्थ्य शिविर सञ्चालन गरी १० हजारभन्दा बढी घाइतेको उपचार गरेको सङ्घले जनाएको छ । 

 

यस्तै सङ्घले भूकम्प प्रभावित जिल्लालाई थप सहयोग गर्ने जनाउँदै सरकारको नीति र योजनाभित्रै रहेर अस्थायी आवास निर्माणमा सहयोग गर्ने तथा जस्तापाता उपलब्ध गराउन पनि पहल गर्ने जनाएको छ । रासस