बनेपा, ४ वैशाख । आँप फुल्ने र बतिला लाग्ने समय भइरहेको बेला बनेपा र आसपासको बजारमा भारतीय आँप छ्यापछ्याप्ती देखिएको छ । 

 

बजारमा आएको भारतीय आँप कति स्वस्थ्यकर वा अस्वस्थ्यकर भन्ने विषयमा बहस भइरहेको बेला त्यस्तो आँप स्थानीय बजारमा छ्यापछ्याप्ती देखिएको हो । 

 

अघि पाक्ने जात यहाँ नभएकाले भारतीय आँप बजारमा आयात गरिएको कृषि विकास कार्यालयले जनाएको छ । कार्यालय प्रमुख दीपक पौडेलले अनुसार बजारमा आएको सो आँप स्वस्थकर नभएकाले प्रसस्त रुपमा खान नहुने बताउनुभयो । 

 

नेपाल फलफूल थोक व्यवसायी सङ्घ काठमाडौँले भने बजारमा आएको आँप औषधिरहित भएको दाबी गरेको छ । 

 

सङ्घले नेपालमा भारतबाट आउने जातका आँप उत्पादन नभएकाले यसको बजार नेपालमा रहेको जानकारी दिँदै नेपाली आँप उत्पादन भएपछि प्रतिस्पर्धा हुन नसकेर स्वतःभारतीय आँप विस्थापित हुने जनाएकोे छ । 

 

सङ्घका अनुसार एक महिनादेखि दशहरी, माल्दा, बदाम, गुलाब फास्ट जातका आँप नेपाली बजारमा आएको र भारतीय उत्पादनका यी आँप चीनसम्म पुगेको छ । 

 

नेपाल फलफूल थोक व्यवसायी सङ्घ काठमाडौँले दिएको जानकारीअनुसार रु २७ लाख बराबरको ४५ देखि ४८ टन भारतीय आँप काठमाडौँ भित्रिएको छ । सोमध्ये बनेपा, धुलिखेल, पाँचखाललगायतका बजारमा झन्डै पाँच टन भारतीय आँप खपत हुने गर्छ । 

 

खाद्य प्रविधि विभाग काठमाडौँ बबरमहलका उपमहानिर्देशक विनय श्रेष्ठले भारतीय आँप स्वस्थ्यकर भए नभएको विषयमा छलफल भइरहेको उल्लेख गर्दै आँपमा कुन रसायन प्रयोग भएको भन्ने विषयमा पहिचान गर्ने काम भइरहेको बताउनुभयो । रासस