कावासोती, १ वैशाख ।

नेपाल विद्युत् प्राधिकरण शाखा परासीको करिब रु १४ करोड ६० लाख महसुुल बक्यौता रहेको छ । विभिन्न शीर्षकबाट रकम जम्मा भई ठूलो रकम बक्यौता रहेको विद्युत् कार्यालयले जनाएको छ । प्राधिकरणका अनुसार बर्दघाट, त्रिवेणी, सूर्यपुरा र परासी उपवितरण केन्द्रबाट यी बक्यौता रकम असुल हुन बाँकी देखिएका छन् । 

बक्यौता रकममा कुल गार्हस्थ्यतर्फ करिब रु आठ करोड ३८ लाख असुल हुन बाँकी रहेको छ । यसैगरी व्यापारीतर्फ करिब रु चार करोड ४३ लाख, औद्योगिकतर्फ रु एक करोड ५२ लाख, नगरपालिकाको रु एक करोड ८० लाख रहेको प्राधिकरणले जनाएको छ । 

 

यस्तै गैर व्यापारी एवम् सरकारी कार्यालय, सडक बत्ती, सिँचाइ, खानेपानी, मठमन्दिरलगायतको बक्यौता बाँकी रहेको विद्युत् कार्यालयले जानकारी दिएको छ । रासस