इटहरी, २८ चैत । धरानस्थित बिपी कोइराला स्वास्थ्य विज्ञान प्रतिष्ठानका उपकुलपति, शिक्षाध्यक्ष, रजिष्ट्रार र अस्पताल निर्देशकको कार्यकक्षमा एक साताअघि लगाइएको ताला खोल्न दबाब बढेको छ । 

 

तालाबन्दीको निन्दा गर्दै तत्काल ताला खोल्न त्यहांँका शिक्षक र कर्मचारीका आधिकारिक सङ्गठन र प्रतिष्ठान व्यवस्थापनले दबाब दिएका छन् । 

 

केही दिनअघि असन्तुष्ट कर्मचारी समूहले गठन गरेको कर्मचारी कल्याण तदर्थ समितिले पदाधिकारीहरुको कार्यकक्षमा अनिश्चितकालीन तालाबन्दी गरेपछि प्रतिष्ठान अस्तव्यस्त बनेको छ । 

 

साथै उच्चस्तरीय तलबमान आयोगको सिफारिस बमोजिम सम्बोधन हुने प्रक्रियामा रहेका कर्मचारीका मागसमेत सङ्कटमा परेको तथा प्रतिष्ठानमा दण्डहीनता र अराजकता बढेकामा आपत्ति जनाउँदै बिनासर्त ताला खोल्न ती सङ्गठनले माग गरेका छन् । 

 

प्रतिष्ठानका आधिकारिक सङ्गठनहरु कर्मचारी कल्याण समाज, चिकित्सा तथा दन्त–चिकित्सा शास्त्र शिक्षक कल्याण समाज र प्रतिष्ठान व्यवस्थापनले छुट्टाछुट्टै विज्ञप्ति जारी गरी ताला खोल्न माग गरेका हुन् । 

 

प्रतिष्ठानका रजिष्ट्रार तुलबहादुर श्रेष्ठले एक सूचना जारी गरी तदर्थ समितिको नाममा तालाबन्दी, धर्नाजस्ता अशोभनीय कार्य गरेर प्रतिष्ठानको कार्यमा बाधा पु¥याउने र प्रतिष्ठानको छविमा आंँच पु¥याउने कार्य गरेको भन्दै कर्तव्यलाई नबिर्सी विरोधका कार्यक्रम छाडेर कार्यमा संलग्न हुन सूचित गर्नुभएको छ । 

 

पटक–पटक हुने विरोधका कार्यक्रमले प्रतिष्ठानमा विषम परिस्थितिको सिर्जना भएकाले जिम्मेवार भएर यथाशीघ्र काम थाल्न शिक्षक कल्याण समाजले आन्दोलनरत कर्मचारीको ध्यानाकर्षण गराएको छ । 

 

यसैगरी कर्मचारी कल्याण समाजको विधान विपरीत कार्य गरी कारबाहीमा परेकाहरुको समूहले प्रतिशोध, जस–अपजस र व्यक्तिगत स्वार्थका लागि स्वास्थ्य संस्थाजस्तो संवेदनशील क्षेत्रमा अनुशासन, आचारसंहिता, मर्यादा र विधिको शासनको आधारभूत मान्यता तोडेर अराजकता सिर्जना गरेको भन्दै अनुशासनहीनहरुलाई कारबाही गर्न व्यवस्थापन र राज्यको निकायसंँग समाजले मागसमेत गरेको छ । 

 

समाजले विज्ञप्तिमा अख्तियार दुरुपयोग अनुसन्धान आयोगले नियन्त्रणमा लिएको प्रतिष्ठानको कागजातउपर निष्पक्ष छानबिन गरी दोषीउपर कारबाही गर्नसमेत माग गरेको छ । 

 

त्यसैगरी ‘पेइङ’ सेवा बन्द भएबाट बिरामीलाई ठूलो कष्ट भइरहेको भन्दै पेइङ सेवा निर्देशिका तत्काल सुधार गरी सेवा सञ्चालन गर्न समाजले व्यवस्थापनसमक्ष माग गरेको छ । रासस