पोखरा, २७ चैत । पोखरा अन्तर्राष्ट्रिय क्षेत्रीय विमानस्थल परियोजनाले थप जग्गा अधिग्रहणमा परेका जग्गाधनीलाई मुआब्जा वितरण सुरु गरेको छ ।

 

परियोजनाले पहिलो चरणमा मुआब्जा वितरणका लागि ८०।३२ रोपनीको सूचना प्रकाशित गरेको थियो । हालसम्म २० जना जग्गाधनीले रु तीन करोड ९२ लाख ७४ हजार ७८१ बुझिसकेको परियोजना कार्यालयका अधिकृत चन्द्रमणि सापकोटाले जानकारी दिनुभयो । 

 

पहिलो चरणमा अधिग्रहणका लागि सूचना प्रकाशित भएकामध्ये बाँकी ३६ जना मुआब्जा वितरणको प्रक्रियामा छन् । बाह्र जनाले जग्गाको सट्टा जग्गै पाउँ भनेर निवेदन दिएका छन् भने १० जना सम्पर्कमा नआएको सापकोटाले बताउनुभयो । 

 

परियोजनाले पहिलो चरणमा सूचना प्रकाशित भएका जग्गाधनीलाई मुआब्जा वितरण गरिसकेपछि बाँकी ५२९ रोपनी जग्गाको मुआब्जा वितरणका लागि सूचना प्रकाशित गर्नेछ । 

 

विसं २०३१ मा पोखराको छिनेडाँडामा अन्तर्राष्ट्रियस्तरको क्षेत्रीय विमानस्थल निर्माण गर्ने उद्देश्यले तीन हजार १०६ रोपनी जग्गा अधिग्रहण गरिएको थियो । 

 

उक्त जग्गा अपुग भएपछि ६२९ रोपनी अधिग्रहण गर्नुपरेको बताइएको छ । रासस