भीमदत्तनगर, २२ चैत ।\

लगातार तीन दिन भएको वर्षाका कारण कञ्चनपुरमा गहुँ उत्पादन १० प्रतिशतले कमी आउने जिल्ला कृषि विकास कार्यालयले जनाएको छ । गहुँ काटेर समेट्ने समयमा आएको वर्षाका कारण खल्ला क्षेत्रमा लगाएको गहुँ पूर्णरुपमा नोक्सान भएको वरिष्ठ कृषि विकास अधिकृत टीकाराम थापाले बताउनुभयो । 

 

‘खल्ला र पानी जमेको ठाउँमा रहेको गहुँ पूर्णरुपले नोक्सान भएको छ”, उहाँले भन्नुभयो, ‘बमौसमी वर्षाका कारण किसानले दुःख पाए ।” जिल्लामा लगाइएको कुल ३० हजार हेक्टर क्षेत्रफलमा गहुँ तयार भइसकेका अवस्थामा वर्षा भएकाले उत्पादनमा कमी आउने उहाँले बताउनुभयो । “प्रतिहेक्टर २।५ मेट्रिकटन गहुँ उत्पादन हुन्थ्यो”, उहाँले भन्नुभयो, “यस वर्ष उत्पादनमा कमी आउने निश्चित छ ।” 

 

त्यसैगरी पछिल्ला दिनमा भएको वर्षाका कारण गहुँको बीउ उत्पादनमा पनि ह्रास आएको छ । “वर्षाका कारण गहुँको बीउ उत्पादनमा पनि समस्या हुने देखियो”, थापाले भन्नुभयो, “गहुँका दानाभित्र पानी पसेकाले गुणस्तर कायम हुन सक्दैन ।” 

 

हावाहुरीसँगै परेको वर्षाका कारण सुदूरपश्चिमभर हिउँदेबालीमा नोक्सान पुगेको कृषि विकास कार्यालयले जनाएको छ । वर्षाका कारण गहुँ, तोरीलगायत तरकारी तथा फलफूलमा समेत क्षति पुगेको छ । 

 

खेतमा पाकेको गहुँ बाली काटेर भित्र्याउन नपाउँदा कृषक चिन्तित बनेका छन् । उता पहाडी जिल्लामा पनि शनिबारको असिनापानीले विभिन्न ठाउँमा हिउँदेबालीमा नोक्सानी पु¥याएको छ । बैतडी, बझाङ, बाजुरा, दार्चुला, डडेल्धुरालगायतका जिल्लामा केही समययता परिरहेको असिनापानीले गहँु बालीसँगै तरकारी खेती र फलफूलसमेत नष्ट गरेको कृषकले बताएका छन् । रासस