धनगढी, १९ चैत ।

कैलाली जिल्लाको धनगढी तथा अत्तरिया नगरपालिका र कञ्चनपुर जिल्लाको झलारी–पिपलाडी तथा भीमदत्त नगरपालिकालाई समेटेर सुदूरपश्चिम क्षेत्रीय एकीकृत सहरी विकास परियोजना लागू गरिएको छ । 

 

सुदूरपश्चिमका यी चार नगर क्षेत्रलाई सहरी पूर्वाधारको विकास गर्दै आधुनिक सहरका रुपमा विकास गर्ने उद्देश्यले सो परियोजना लागू भएको धनगढी नगरपालिकाका कार्यकारी अधिकृत रामलाल श्रेष्ठले बताउनुभयो । 

 

सहरी पूर्वाधारको विकासका लागि एकीकृत सहरी विकास परियोजनामार्फत सुदूरपश्चिमका ती नगरक्षेत्रमा ठूलो लगानी भित्रिन लागेको यो पहिलो पटक भएको बताइएको छ ।

 

एसियाली विकास बैंकको आर्थिक तथा प्राविधिक सहयोगमा लागू भएको सो परियोजनासँगै यी नगरक्षेत्र आधुनिक सहरका रुपमा विकास हुने अपेक्षा गरिएको छ । पाँचवर्षे अवधिको सो परियोजनाअन्तर्गत सहरी विकासका लागि करिब रु १० अर्ब लगानी हुन लागेको बताइएको छ । 

 

परियोजना कार्यान्वयनका क्रममा एसियाली विकास बैंक र सहरी विकास तथा भवन निर्माण विभागको प्राविधिक टोलीले सरोकार भएकाहरुसँग स्थलगत रुपमा छलफल गरिरहेको छ । साथै यी सहरको दीर्घकालीन सोच कस्तो बनाउने भन्ने उद्देश्यले आगामी वैशाख पहिलो हप्ताभित्र सरोकार भएकाहरुसँग थप छलफल गर्ने तयारी गरिएको छ । 

 

परियोजना कार्यान्वयनका क्रममा धनगढी नगरक्षेत्रको हकमा बर्सेनि हुने डुबानको समस्यालाई केन्द्रित गरी ढल निकासको दिगो प्रबन्ध, सहरी सडकको विस्तार तथा स्तरोन्नति, फोहरमैला व्यवस्थापन, आधुनिक बस बिसौनीको भवन निर्माण, समुदायमा आधारित रोजगारमूलक सहरी गरिबी न्यूनीकरण कार्यक्रम, पर्यटन विकासलगायत क्रियाकलाप गर्ने योजना छ । रासस