मुस्ताङ, १५ चैत । कागबेनीका बासिन्दाले २५ वर्षअघि निर्माण गरिएको नेपालकै पहिलो वायु ऊर्जा आयोजना सञ्चालन गर्न माग गरेका छन् । 

 

आफ्ना क्षेत्रमा राष्ट्रिय प्रसारण लाइन भरपर्दो नभएको भन्दै उनीहरुले तत्काल आयोजनाको थप सम्भाव्यता अध्ययन गरी सञ्चालन गर्न आग्रह गरेका हुन् । सरकारी बेवास्ताका कारण नेपालकै पहिलो आयोजना अलपत्र बनेको कागबेनीका पूर्वगाविस अध्यक्ष नोर्बु गुरुङले बताउनुभयो । “नेपालमा दिन प्रतिदिन विद्युत्भार कटौती बढ्दै गएको छ तर भएका योजनाको सञ्चालन गर्न कसैले सरकारको ध्यान गएको छैन”–गुरुङले भन्नुभयो–“जसरी हुन्छ यो आयोजना सञ्चालन गर्नुपर्छ ।” 

 

पर्याप्त बजेट र जनशक्ति अभाव रहेको भन्दै सञ्चालनमा आएको तीन महिनामै वायु ऊर्जा आयोजना बन्द भएको थियो । तीव्र गतिमा बहने हावालाई प्रविधिको सहयोगमा विद्युत् उत्पादन गर्ने आयोजना मुस्ताङमा प्रभावकारी भए पनि त्यसको थप अनुसन्धान र सम्भाव्यता अध्ययन हुन सकेको छैन । 

 

विद्युत् उत्पादनका लागि निर्माण गरिएको भवन अहिले जीर्ण बनेको छ । ट्रान्समिटर र ब्याट्री एउटा कोठामा थन्काइएको छ । भवनबाहिर घुम्ने पङ्खा अलपत्र अवस्थामा छ । यहाँ बिहान ११ देखि अपराह्न ४ बजेसम्म तीव्र गतिमा हावा चल्छ । विद्युत् उत्पादनको सफल परीक्षणपछि स्थानीय ६० घरले तीन महिनासम्म ऊर्जा उपभोग गरेको कागबेनीका फुर्बा गुरुङले बताउनुभयो । 

 

“गाविस र स्थानीयवासीले कति पैसा लगाउनुपर्छ, हामी तयार छौँ तर यो प्रयोगमा ल्याउनुप¥यो”–उहाँले भन्नुभयो–“यसो भयो भने यहाँका पर्यटन व्यवसायलाई थप सघाउ पु¥याउनेछ, कागबेनीमा नयाँ प्रयोग भयो भनेर संसारभर चर्चा भए पनि त्यसले निरन्तरता पाउन सकेन, विभिन्न देशका नागरिकले पनि अहिले हामीलाई प्रश्न गर्छन् । ” रासस