जितेन्द्र भण्डारी

पाँचथर,फागुन ९,

पाँचथरको फिदिममा रहेको एक पसलमा मिनरल वाटर भित्र मरेको मुसा र लेदो भेटिएको छ । जिल्ला प्रशासन कार्यालय पाँचथरको आज नवनिर्मित भवनको गृहसचिव सूर्य प्रसाद सिलवालले गर्ने उद्घाटन कार्यक्रममा फिदिम स्थित तिमल्सना स्टोर्सले दिएको २० काटुन मिनरल वाटर भित्र मरेको मुसा र लेदो भेटिएको प्रशासन कार्यालयका खरिदार सुरेन्द्र दाहालले वताउनुभयो ।

 

 उहाँले भन्नुभयो,“आज हुने नवनिर्मित भवनको उद्घाटनका क्रममा खरिद गरेका पानीको वोतल खोलेर पानी खान खोज्दा मरेको मुसा र लेदो भेटिएको हो ।”

 

यस्तै उक्त पानी २०१४ अक्टोवरमै म्याद सकिएको पाइएको थियो । उक्त मिनरल वाटर इलाम स्थित वाटर इन्ड्रस्टिज प्रा.लि.ले वजारमा ल्याएको हो ।

 

यसैविच तिम्लसेना स्टोर्सका प्रोपाइटर प्रकाश तिमल्सेनाले कम्पनीमै फिर्ता गर्न लैजानका लागि लगिएको पानी नयाँ कामदारले भूलवश दिएको वताउनुभयो । यता प्रमुख जिल्ला अधिकारी प्रदिपराज कडेलले भने यसवारे छानविन गरिने वताउनु भएको छ ।