पवन पौडेल

तनहुँ फागुन ९ । जेसिआइ व्यास नगरको आतिथ्यमा दमौलीमा सञ्चालित नेपाल जेसिजको नोम लोम लिडर्स एकेडेमी शनिबार सकिएको छ ।

 

दमौलीका विभिन्न भागमा शुक्रबारबाट सञ्चालन गरिएको प्रशिक्षणमा जेसिजका राष्ट्रिय समितिका पदाधिकारीहरु तथा देशभरका शाखा पदाधिकारीहरुका लागि नेतृत्व विकास, जेसिजको कार्य योजना लगायतका विषयमा प्रशिक्षण प्रदान गरिएको थियो । तीन दिनसम्म चलेको प्रशिक्षणको शनिबार समापन गरियो ।

 

प्रशिक्षणमा जेसिजमा आबद्ध १ सय २५ शाखा तथा राष्ट्रिय समितिका गरी करिब पाँच सय जनाको सहभागीता रहेको जेसिआइ कार्यक्रमका संयोजक एवं जेसिआइ व्यास नगरका निवर्तमान अध्यक्ष सुरेश पुरीले बताए ।

 

जिल्लामै पहिलो पटक सञ्चालन गरिएको राष्ट्रियस्तरको प्रशिक्षणका सहभागीलाई दमौलीकै होटलहरुमा बसोबासको प्रबन्ध गरिएको थियो । कार्यक्रम सफलतापूर्वक सम्पन्न भएको जेसिआइ व्यास नगरका अध्यक्ष माधव न्यौपानेले बताए ।