मुस्ताङ, २९ माघ ।

सबैभन्दा पुरानो र ऐतिहासिक महत्व राख्ने थाक पुस्तकालयको भवन जीर्ण बनेको छ । 

 

विसं २००७ मा टुकुचेवासीको पहलमा ढुङ्गा र विशेष किसिमको माटोबाट निर्मित पुस्तकालयको भवन चर्किएर भत्किने अवस्थामा पुगेको छ । भवनको छानोबाट पानी चुहिने भएपछि दुई महिनादेखि पुस्तकालयमा रहेका पुस्तक नजिकैको रेडक्रसको भवनमा राखिएको छ । नेपालमा प्रजातन्त्र प्राप्तिसँग जोडिएको पुस्तकालयको भवन जीर्णोद्धार गर्न स्थानीयवासीले माग गरेका छन् । 

 

पुस्तकालय व्यवस्थापन समितिका कोषाध्यक्ष पथबहादुर थकालीले प्रजातन्त्र स्थापना भएको सालमै स्थापित पुस्तकालयको ऐतिहासिक महत्व रहेको बताउँदै भन्नुभयो, “हाम्रा समाजसेवी एवम् शिक्षाप्रेमी नरसिंहभक्त तुलाचनको नेतृत्वमा स्थापित पुस्तकालयले जिल्लामा शैक्षिक जागरण ल्याएको हो, सरकारले पनि हेर्नुप¥यो, अन्य सामाजिक सङ्घसंस्थाबाट पनि सहयोगको अपेक्षा गरेका छौँ ।” 

 

पुस्तकालयको नयाँ ढलानयुक्त भवन निर्माण गर्न स्थानीयवासीले जिविसलाई समेत आग्रह गरेका छन् । पुस्तकालयमा पाठ्यपुस्तकदेखि धर्म, साहित्य, कला र ऐतिहासिक महत्वका सात हजार पुस्तक छन् । “एक वर्षअघिसम्म पानी खासै चुहिने थिएन, तर यस वर्ष पटक पटक परेको हिउँले थप समस्या भएको हो”, थकालीले भन्नुभयो । 

 

नयाँ भवनलाई रु ६० लाख बजेट आवश्यक पर्ने पुस्तकालय व्यवस्थापन समितिले जनाएको छ । पुस्तकालयमा पुस्तक र आन्तरिक व्यवस्थापनमा रिड नामक शैक्षिक संस्थाले निरन्तर सहयोग गर्दै आएको छ । स्थानीयवासीको पुस्तकालयप्रतिको लगावकै कारण रिडले थाक पुस्तकालयलाई दुई पटकसम्म उत्कृष्ट पुस्तकालयको पुरस्कार प्रदान गरेको थियो । 

 

टुकुचे गाविसका सचिव टोपबहादुर ढुङ्गानाले गाविसले चालु आवमा पुस्तकालय भवन मर्मतसम्भारका लागि रु ५० हजार रकम विनियोजन गरेको बताउनुभयो । “तर यति रकमले केही पनि हुँदैन, इलाका परिषद्बाट हामीले प्राथमिकतामा राखेर जिविसमा माग गरेका छौँ” ढुङ्गानाले भन्नुभयो, “जिल्लाकै धरोहर पुस्तकालय भएकाले सबैले सहयोग गर्ने विश्वास छ ।” रासस