विराटनगर, २९ माघ ।

मोरङलाई पूर्ण साक्षर जिल्ला घोषणा गर्नका लागि सघन साक्षरता कार्यक्रमअन्तर्गतको सहजकर्ताका लागि तीनदिने अभिमुखीकरण तालिम सुरु भएको छ । 

 

जिल्ला शिक्षा कार्यालय मोरङको सहयोगमा सरस्वती उच्च माध्यमिक विद्यालय दादरबैरिया तथा सोराभाग ग्राम देवता सामुदायिक अध्ययन केन्द्रको आयोजनामा बुधबारबाट तालिम सुरु भएको हो । 

 

सरकारको योजनाअनुसार मोरङसहित १७ जिल्लामा सन् २०१५ भित्र निरक्षर उन्मूलन हुुने जिल्लाको सूचीमा रहेको जिल्ला शिक्षा कार्यालय मोरङका शिक्षा अधिकारी दिनेश श्रेष्ठले जानकारी दिनुभयो । 

 

मोरङमा ८३ हजार ५९७ जना निरक्षर रहेको र यस वर्ष नै सबैलाई साक्षर बनाइने लक्ष्यका साथ अभिमुखीकरण कार्यक्रम सुरु गरिएको उहाँले बताउनुभयो । सो तालिममा १४८ सहजकर्ताको सहभागिता रहेको छ । रासस