बाबियाचौर ९म्याग्दी०, २९ माघ ।

म्याग्दीको कुईनेमङ्गलेलाई बुधबार पूर्ण खोप गाविस घोषणा गरिएको छ । 

 

कुईनेमङ्गले गाविसमा रहेका १२ देखि २३ महिना उमेर समूहका २१ बालबालिकाले एक वर्षमा लगाउनुपर्ने सबै खोपको मात्रा पूरा गरेपछि जिल्ला स्वास्थ्य कार्यालय, स्वास्थ्य संस्था व्यवस्थापन समिति र गाविस कार्यालयको आयोजनामा पूर्ण खोप गाविस घोषणा गरिएको हो । 

 

घोषणा कार्यक्रममा सहभागी स्थानीय सरोकारवालाले आगामी दिनमा जन्मने बालबालिकालाई पनि अनिवार्य खोप लगाउने प्रतिबद्धता जनाएका छन् । 

 

कुईनेमङ्गलेसहित हालसम्म म्याग्दीको २९ वटा गाविस र बेनी नगरपालिकाको छवटा वडालाई पूर्ण खोप घोषणा गरिएको जिल्ला स्वास्थ्य कार्यालयका खोप अधिकृत एकनारायण लम्सालले जानकारी दिनुभयो । 

 

घोषणा कार्यक्रममा जिल्ला जनस्वास्थ्य अधिकृत नारायण चौधरीले खोप लगाउँदा बालबालिकालाई सङ्क्रमक रोग लाग्नबाट बचाउन सकिने बताउनुभयो । रासस