गौशाला, १५ माघ ।

जिल्ला भन्सार कार्यालय महोत्तरीमा विभिन्न समयमा पक्राउ गरी ल्याइएको रु दुई करोडभन्दा बढी मूल्यका सवारी लिलाम नहुँदा कवाडी बन्दै गइरहेका छन् । 

 

जिल्लाका सुरक्षा निकायले जिल्लाभित्र अवैधरुपमा फेला पारेका ठूलासाना करिब १२ दर्जनभन्दा बढी सवारीसाधन विगत दुई वर्षदेखि लिलाम हुन नसक्दा सो गाडी कवाडीमा परिणत हुने क्रममा रहेको छ । 

 

महोत्तरी प्रहरीले भारत तथा नेपालका विभिन्न जिल्लाबाट अवैधरुपमा चोरी गरी भित्र्याइएका मोटरसाइकल तथा चारचक्के विभिन्न प्रकारका जिप र साइकललगायत रु दुई करोड १२ लाख २४ हजार ९०० मूल्य बराबरको गाडी लिलामी प्रक्रियामा जान नसक्दा भन्सारमै थन्किएको जनाएको छ । 

 

पक्राउ परेका गाडी अधिकांश नयाँ, अनटेस्ट तथा फर्जी नम्बर प्लेटका रहेका छन् भने सबै गाडी चालु अवस्थामा रहेका छन् । तर भन्सार कार्यालयले सो गाडीको लिलामी प्रक्रिया अगाडि नबढाउँदा चालु अवस्थामै रहेको सवारीसाधन बिग्रिने क्रम बढेको छ 

 

अवैध चोरीबाट आयातित ती गाडी समयमै लिलाम हुन नसक्दा जिल्ला भन्सार कार्यालयले लाखाँै रुपैयाँको राजस्व घाटा बेहोर्नुपरेको छ । 

 

यस सन्दर्भमा जिल्ला भन्सार कार्यालयले विभागमा कति पटक पत्राचार गरिसकेको र आदेश आउना साथ कानुनी प्रक्रिया पूरा गरी गाडी लिलाम गरिने कुरा जनाएको छ । 

 

जिल्ला प्रहरी कार्यालय महोत्तरीका प्रहरी नायब उपरीक्षक लोकेन्द्र श्रेष्ठले आव ०६९÷७० मा करिब रु ५४ लाख, आव ०७०÷७१ मा करिब रु एक करोड ३२ लाख र चालु आवको अहिलेसम्म करिब रु २५ लाखको सवारीसाधन समातेर भन्सार कार्यालयमा बुझाएको तर ती सबै सवारी अहिलेसम्म लिलाम नभएको बताउनुभयो । रासस