पथरी, १५ माघ ।

ढल तथा नाला र सडक विस्तारका लागि मापदण्ड विपरीत विराटनगर उपमहानगरपालिका क्षेत्रमा बनाइएका घरटहरा भत्काउन आइतबारदेखि सुरु गरिने भएको छ । 

 

विराटनगर उपमहानगरपालिकाका कार्यकारी अधिकृत गोपालप्रसाद रेग्मीका अनुसार विराटनगर बजारभित्रको काम तीन ठाउँबाट एकैपटक सुरु गर्ने जानकारी दिनुभयो । 

 

उहाँले ढल, नाला तथा सडक निर्माण र मापदण्ड विपरीत बनाइएका विराटनगर बजारभित्रका सबै घर भत्काइने बताउनुभयो । 

 

उता उपमहानगरपालिका विरुद्ध आन्दोलन गर्दै आएको नागरिक सङ्घर्ष समितिले क्षतिपूर्ति नदिई घर भत्काउन नदिने बताउँदै आएको छ । 

 

समितिका संयोजक राजेन्द्रप्रसाद गुप्ताले मुआब्जा नदिई कसैको व्यक्तिगत सम्पत्ति भत्काउन नपाउने बताउनुभयो । गुप्ताले पुनरावेदन अदालत विराटनगरले सडक विस्तार गर्दा र घर भत्काउँदा मुआब्जा दिनु भनी निर्णय गरेको दाबी गर्नुभयो । 

 

तर पुनरावेदन अदालतले पुष्पलाल चोक र तिनपैनी चोकमा पर्ने सातघरको विषयमा मात्र फैसला गरेको उपमहानगरपालिकाले जनाएको छ । रासस