काठमाडौँ,माघ ,१३

सूचना तथा संचारमन्त्री डा. मिनेन्द्र रिजालले नीजि क्षेत्रका संचारगृहको स्वामित्व कस्तो प्रकृतिको हुने भन्ने विषयमा मन्त्रालयलाई निर्णय गर्न कठिनाइ भएको भन्दै सुझावका लागि सभासद्हरुसँग आग्रह गर्नुभएको छ ।

 

व्यवस्थापिका संसद्को विकास समितिको मंगलबारको बैठकमा सूचना तथा संचारमन्त्री डा. रिजालले नीजि क्षेत्रका संचारगृहको स्वामित्व कस्तो प्रकृतिको हुने भन्ने विषयमा निर्णय लिन नसक्दा सूचना प्रसारण नीति बनाउने काममा प्रगति हुन नसकेको बताउनुभयो ।

 

समितिले आफूले दिएका निर्देशनको कार्यान्वयन अवस्था बारेमा छलफलका सूचना तथा संचारमन्त्री डा. रिजाललाई बैठकमा बोलाएकामा मन्त्री रिजालले चलचित्र विकास नीति तर्जुमाको काम अन्तिम चरणमा पुगेको तर सूचना प्रसारण नीति भने मस्यौदाकै चरणमा रहेको बताउनुभयो । 

 

 

उहाँले एउटै संचारगृहले एकै प्रकृतिका वा भिन्न प्रकृतिका प्रकाशन र प्रसारण संचार माध्यम संचालन गर्न पाउने÷नपाउने विषयमा गहिरो वहस आवश्यक रहेको बताउनुभयो । उहाँले सूचनामा एकाधिकार कायम नहोस् भन्नेतर्फ सरकार सचेत रहेको भन्दै यस विषयमा आवश्यक सझाव दिन सभासद्हरुसँग आग्रह गर्नुभयो । 

 

सूचना तथा संचारमन्त्री डा. रिजालले चलचित्र विकास नीति भने अर्को साता मन्त्रीपरिषद्मा पेश गरिने बताउनुभयो । उहाँले गायक गायिका तथा गीतकारलाई रोयल्टी दिने सम्बन्धमा संयन्त्र गठनको तयारी भइरहेको बताउनुभयो ।

 

समितिको मंसिर ३ गतेको बैठकले कलाकारहरुले तत्काल रोयल्टी पाउने व्यवस्था गरी तीन महिनाभित्र प्रगति विवरण उपलब्ध गराउन सरकारलाई निर्देशन दिएको थियो । बैठकमा समितिले  स्थानीय विकास मन्त्रालयलाई  दिएका निर्देशनको कार्यान्वयनका अवस्था बारेमा पनि छलफल भएको थियो ।