प्यूठान, १७ फागुन । यहाँका युवा समाजसेवी हत्या प्रयासमा संलग्न अभियुक्तमध्ये एकजनालाई प्रहरीले पक्राउ गरेको छ । 

 

कालिका विकास केन्द्रका महासचिव एवम् समाजसेवी बिजुजवारका सनतकुमार श्रेष्ठ हत्या प्रयास काण्डमा संलग्न दीपक सापकोटा पक्राउ परेको प्यूठानका प्रहरी नायब उपरीक्षक तुलबहादुर कार्कीले बताउनुभयो । 

 

जिल्ला प्रहरी कार्यालयबाट खटिएको विशेष प्रहरी टोलीले सापकोटालाई उनकै घर रम्दी तिघ्राबाट पक्राउ गरेको हो । 

 

श्रेष्ठ हत्या प्रयास घटनामा संलग्न अन्य एकजना अझै फरार रहेको प्रहरीले जनाएको छ । फरार अभियुक्तको अनुसन्धान र खोजतलास भइरहेको कार्कीले बताउनुभयो । 

 

श्रेष्ठमाथि गत भदौ २२ गते चेरनेटा र दाखाक्वाडीको जङ्गल पर्ने बाटोमा हत्या प्रयास भएको थियो । नियोजित रुपमा हत्या प्रयास भएको भन्दै जिल्लाका सरोकारवालाले घटनामा संलग्नलाई पक्राउ गर्नमा दबाब दिँदै आएका थिए । 

 

श्रेष्ठले आफूलाई हत्या गर्ने योजनाअनुरुप घटना भएको भन्दै घटनामा संलग्नका विरुद्ध किटानी जाहेरी दिनुभएको थियो । 

 

लामो समयपछि घटनामा संलग्नलाई पक्राउ गरिएको भन्दै उहाँले अन्यलाई पक्रन पनि प्रहरीलाई आग्रह गर्नुभएको छ । रासस