१७ फागुन, काठमाडौं ।

स्वाइनफ्लुबाट काठमाडौंमा एक महिलाको मृत्यु भएको छ । काठमाडौंको मोडल अस्पतालमा उपचार गर्दागर्दै काठमाडौं क्षेत्रपाटीकी ५० बर्षीया महिलाको शनिबार मृत्यु भएको हो ।

 

इिपिडिमियोलोजी तथा रोग नियन्त्रण महाशाखाले यसको आइतबार मात्रै पुष्टि गरेको छ । मृतक महिलाको परिचय गोप्य राखिएको छ । उनको आईसीयूमा राखेर उपचार गर्दागर्दै मृत्यु भएको बताइएको छ ।

 

ति महिलामा स्वाइन फ्लु भएको भनेर अस्पतालले गत विहीबार पुष्टि गरेको थियो । रुघा लाग्ने, टाउको दुख्ने, स्वासप्रश्वासमा समस्या भएपछि उनलाई १५ दिनअघि अस्पताल भर्ना गरिएको थियो । यसअघि गएको वर्ष स्वाइन फ्लुकै कारण राष्ट्रिय योजना आयोगका सहसचिव भवकृष्ण भट्टराईको निधन भएको थियो । भारतमा महामारीको रुपमा फैलिएको स्वाइनफ्लु संक्रमित विरामीको संख्या नेपालमा ३० पुगेको छ ।

 

स्वाईन फ्लु सर्तकताका लागी सरकारले विभिन्न सिमानाकामा हेल्थ डेस्कको स्थापना गरेपनी प्रभावकारी नभएको गुनासो बढेको छ । स्वाईन फ्लुबाट बच्न बिशेष सर्तकता अपनाउन चिकित्सकले सुझाव दिएका छन् ।

 

मास्क लगाएर हिँडडूल गर्ने, रुघाखोकी र ज्वरो आउने बित्तिकै परीक्षण गरेर औषधी खाने गरेमा संक्रमणबाट बच्न सकिन्छ । रुघाखोकी र स्वाइन फ्लुको एउटै लक्षण देखिने हुँदा रुघाखोकी लाग्नासाथ परीक्षण गर्नुपर्ने इपिडिमियोलोजी तथा रोग नियन्त्रण महाशाखाका प्रमुख डाक्टर बाबुराम मरासिनीले बताउनुभयो ।