उद्धव घिमिरे

विराटनगर, फागुन १५ ।

 

अनाधिकृत रुपमा टेलीफोनको कल बाइपास गर्ने दुईजनालाई मोरङ प्रहरीले उपकरण सहित पक्राउ गरेको छ ।

 

जिल्ला प्रहरी कार्यालयले आज विराटनगरमा पत्रकार सम्मेलनको आयोजना गरि बरामद गरिएका उपकरण सहित पक्राउ परेका दुबैजनालाई सार्वजनिक गरेको छ । 

 

सार्वजनिक गरिएका अभियुक्तहरुमा खोटाङ जिल्ला अर्खौले – ३ घर भइ सुनसरी हाँसपोसामा डेरा गरि बस्दै आएका २५ बर्षिय देवराज बस्नेत र पाँचथर वलने घर भइ कोशी हरैचा नगरपालिकामा डेरा गरि बस्ने २७ बर्षिय कविन भुजेल रहेका छन ।

 

अभियुक्तहरुले कोशी हरैचा नगरपालिका–१  विराटचोकमा कोठामा भाडामा लिएर गोप्यरुपमा जिएसएम ओभर इन्टरनेट प्रोटोकल संचालन गर्दै कल बाइपास गर्दै आएको सुराकीका आधारमा प्रहरीले पक्राउ गरेको जनाइएको छ ।

उनिहरुलाई प्रहरीको केन्द्रीय अनुसन्धान ब्युरो तथा इलाका प्रहरी कार्यालय बेलबारीको संयुक्त टोलीले कल बाइपासमा प्रयोग गरिंदै आएका उपकरण सहित पक्राउ गरिएको मोरङका प्रहरी उपरीक्षक तारीणीप्रसाद लम्सालले बताउनुभयो ।

 

अभियुक्तहरु संगै प्रहरीले कल बाइपास प्रयोग गर्न गरिएको जीओआइपी डिभाइस ३ थान, एनसेल र एनटीसीको सिम ४ सय बढी, दुइसय थान रिचार्ड कार्ड, राउटर २ थान र डेल कम्पनीको ल्यापटप २ थान सहित चार्जर र स्टेपलाइजर लगायतका उपकरण समेत बरामद गरेको छ  ।

 

पक्राउ गरिएका अभियुक्त मध्ये देवराज बस्नेत यस अघि २ बर्ष पहिला समेत कलबाइपास गरेकै अभियोगमा पक्राउ परि ६० हजार धरौटीमा रिहा भएको प्रहरीले जनाएको छ । उनिहरु विरुद्ध दुरसंचार ऐन २०५३ अनुसार कार्वाही प्रत्रिया अघि बढाइने समेत प्रहरीले जनाएको छ ।