सप्तरी, फागुन १४

सशस्त्र प्रहरी बल बोर्डर आउट पोष्ट रामनगर सप्तरीले बिहिबार एउटा राइफल तथा सोमा लाग्ने आठवटा गोलीसहित चार जनालाई पक्राउ गरेको छ ।

 

पक्राउ पर्नेहरुमा सिरहा जिल्लाको इनरुवा ८ बस्ने ३५ वर्षिय जयमाला यादव तथा भारतको सुनवर्षा कटरी मधुवनी बिहार बस्ने ३० वर्षिय बाबुकुमार साहाव, भारतकै मजिगबा मडौका उपहार इलाहावाद बस्ने ३० वर्षिय डा.सुरज कुमार साह र भारतको आमगोदार इलाहावाद बस्ने ३० वर्षिय हरिशंकर छन् ।

 

उनीहरुलाई सशस्त्र प्रहरी बल बोर्डर आउट पोष्ट रामनगर सप्तरीबाट सशस्त्र प्रहरी निरीक्षक ज्ञानदिप राज स्याङताङको कमाण्डमा खटिएको एपीएफ टोलीले बिहिबार दिउँसो सप्तरी जिल्लाको रामनगर ५ स्थित हातडाँडा भन्ने ठाउँमा पक्राउ गरेको हो ।

 

पक्राउ पर्ने मध्ये बाबुकुमार साहाबले हाँकेको युपी ७० सीजे १६३९ नम्बरको गाडीमा एपीएफ टोलीले जाँच गर्दा उक्त हतियार भेटिएपछि सो गाडीमा सवार चारै जनालाई पक्राउ गरिएको हो । उनीहरु मध्ये डा.सुरजकुमार साहले सो हतियार आफ्नो भएको बताएका छन् ।

 

पक्राउ परेका चारै जनालाई एपीएफ टोलीले उक्त हतियार तथा गोली र उनीहरुले प्रयोग गरेको गाडीसहितै आवश्यक कारवाहीको लागि स्थानीय प्रहरीलाई बुझाएको छ ।