गौशाला, १३ फागुन । मिथिलाको महाकुम्भ मानिएको १५ दिने माध्यमिकी परिक्रमाअन्तर्गत महोत्तरीको धु्रवकुण्डमा आज बिहान एक परिक्रमा यात्रीको मृत्यु भएको छ । 

 

मृत्यु हुनेमा महोत्तरीको सोनामाई गाविस– २ बस्ने सन्तोष गिरीकी पत्नी ४५ वर्षीया उर्मिला गिरी रहेको जिल्ला प्रहरी कार्यालय महोत्तरीले जनाएको छ । 

 

गत बुधबार धनुषाको जनकपुरधामबाट भगवान् राम जानकीको डोलासँगै परिक्रमा यात्रा सुरु गरेकी यात्री गिरीकोे १५ दिने परिक्रमा यात्राको छैटौँ विश्रामस्थल महोत्तरीको धमौरा गाविस– ३ स्थित धु्रवकुण्डमा आज बिहान मृत्यु भएको प्रहरी नायब उपरीक्षक लोकेन्द्र श्रेष्ठले बताउनुभयो । 

 

केही दिनदेखि बिरामी रहेकी यात्री गिरीले बिरामी भए पनि भगवान्सँगै धार्मिक यात्रा गर्ने जिद्धी गरेर परिक्रमा घुमिरहेकै बेला आज बिहान धु्रवकुण्ड पुगेर उनको यात्रामै मृत्यु भएको उनीसँगै परिक्रमा यात्रा गरिरहेका उनका पति सन्तोष गिरीले बताउनुभयो । रासस