कालिका, चैत २९ ।  

राष्ट्रिय प्रजातन्त्र पार्टी(प्रजातान्त्रिक) का केन्द्रीय उपाध्यक्ष तथा पूर्वमन्त्री बिक्रम पाण्डेले आफू मन्त्री र सांसद हुँदा शुरु गरेको विकास निर्माणका कार्यहरुलाई नयाँ सरकारले पुरा गर्नेमा आशावादी रहेको बताउनु भएको छ । 

 

राष्ट्रिय प्रजातन्त्र पार्टी (प्रजातन्त्रिक) चितवनले बिहिबार आयोजना गरेको नव बर्ष २०७५ को शुभकामना आदान प्रदान कार्यक्रमलाई संबोधन गर्दै केन्द्रीय उपाध्यक्ष पाण्डेले यस्तो बताउनु भएको हो । पूर्व मन्त्री समेत रहनु भएका पाण्डेले चितवन क्षेत्र नम्बर ३ मा बिकास निर्माणका कार्यहरु शुरु भई सकेको बताउदै यसलाई निरन्तरता दिई नयाँ सरकारले पूर्णता दिलाउने बिश्वास रहेको बताउनु भएको थियो । 

 

बर्तमान सरकारको काम कार्वाही ६ महिना भित्र थाहा हुने बताउँदै उहाँले अहिले नै यो र त्यो गर्यो भन्ने भन्दा पनि आगामी ६ महिना भित्रमा सरकारले गर्ने काम कारवाहीको बारेमा थाहा हुने बताउनु भयो । केन्द्रीय उपाध्यक्ष पाण्डेले आफ्नो कार्यकालका बेला जनताको सेवाको लागी धेरै योजना निर्माण गरेको दाबी समेत गर्नु भयो । उहाँले अझै धेरै काम गर्नु पर्ने बताउनु पनि भयो । उपाध्यक्ष पाण्डेले आफु सदैब जनताको साथमा रहेर काम गर्न समेत प्रतिवद्ध रहेको बताउनु भएको थियो ।

 

जिल्ला भरीका नेता तथा कार्यकर्ताहरुको उपस्थिति रहेको कार्यक्रममा बोल्दै सहभागी नेता कार्यकर्ताहरुले आगामी दिनमा सबै एक ढिक्का भएर अगाडि बढ्नु पर्ने धारणा राख्नु भएको थियो । पार्टीलाई समृद्ध र सुदृढिकरणको लागी पदीय जिम्मेवारी अनुसार सक्रिय हुनु पर्ने कुरामा समेत नेता कार्यकर्ताहरुको जोड रहेको थियो । 

 

राष्ट्रिय प्रजातन्त्र पार्टी(प्रजातान्त्रिक)का जिल्ला अध्यक्ष बिष्णु प्रसाद वागलेको अध्यक्षतामा सम्पन्न भएको कार्यक्रममा पुर्व केन्द्रीय सदस्य पवित्र जोशी, केन्द्रीय सदस्य द्धय रामहरी कडेल र शिवकुमारी सुवेदी, जिल्ल उपाध्यक्ष रुद्र ढकाल, जिल्ला प्रवक्ता चेतनाथ वाग्ले, सहसचिव दिनेश अधिकारी लगाएत बडा अध्यक्षहरुले सुभकामना मन्तब्य राख्नु भएको थियो ।