कालिका, २८ चैत ।  

हिंसा न्युनीकरणको लागी पहिले आफैंबाट परिवर्तन हुनु पर्ने एक कार्यक्रममा बोल्ने बक्ताहरुले बताएका छन् । चितवनका अगुवा महिलाहरुले आयोजना गरेको नव वर्षको शुभकामना आदन प्रदान तथा सामाजिक अभियानमा सकारात्मक सोचको शक्ति विषयक अन्तरक्रियामा बोल्ने बक्ताहरुले यस्तो बताएका हुन् ।

 

अन्तरक्रियामा बोल्दै उनीहरुले समाज परिवर्तनको लागी सोच, बिचार र ब्यवहारमा परिवर्तन ल्याउन आवश्यक रहेको औल्याएका थिए । आगामी दिनमा शक्ति र सकारात्मक सोच बढाउनका लागि कार्यक्रमको आयोजना गरिएको कार्यक्रम संयोजक बन्दना खाँडले बताउनु भयो । अगुवा महिलाहरुले छुट्टै खालको सकारात्मक सोच लिएर नयाँ वर्षलाई स्वागत गराउने उद्देश्य रहेको उहाँको भनाई छ । 

 

यस्तै कार्यक्रममा बोल्दै भरतपुर महानगरपालिकाका उप मेयर पार्वती शाहले मानिसले सकारात्मक सोच लिएर अगाडी बढ्दा त्यसमा बिभिन्न बाधा आएपनि त्यो सकारात्मक नै हुने बताउनु भयो । उहाँले सबै सामाजिक अभियन्ताहरु एकताबद्ध भएर लागे महानगरपालिका बिकास र समृद्धितर्फ लाग्ने बताउनु भयो । यसको लागी हरेक घरघरबाट परिवर्तन हुन आवश्यक रहेको उहाँको भनाई थियो । 

 

अन्तरक्रिया कार्यक्रममा कृषि तथा वन विश्वविद्यालय रामपुरका प्राध्यापक डा. होमबहादुर बस्नेतले सहजीकरण गर्नु भएको थियो । स्त्रीरोग बिशेषज्ञ तथा समाजसेवी डा. सारदा कुँवरको अध्यक्षतामा सम्पन्न भएको कार्यक्रममा नेप्सकुनका सञ्चालक सदस्य शान्ति अधिकारी, राष्ट्रिय महिला आयोगका पूर्व कार्यबहाक अध्यक्ष भगवती घिमिरे लगायतका बिभिन्न क्षेत्रबाट अगुवाई गरिरहनु भएका महिला अभियन्ताहरुको सहभागिता रहेको थियो ।