कालिका, ६ चैत ।  

प्रदेश नम्बर ३ का समाजिक बिकास मन्त्री युवराज दुलालले वर्तमान सरकारलाई सबैको साथ र सहयोग हुनु पर्ने बताउनु भएको छ । आज भरतपुरमा आयोजित मानव बेचबिखन र लैंगिक हिंसा अन्त्य गर्नका लागि समाज रुपान्तरणका लागि सकारात्मक सोच बिषयक अन्तरक्रिया कार्यक्रममा उहाँले यस्तो कुरा बताउनु भएको हो ।

 

सोही अवसरमा उहाँले आगामी ५ वर्षमा मुलुकमा आमुल परिवर्तन हुन सक्ने पनि उद्घोष गर्नु भएको थियो । मुलुक नयाँ चरणमा प्रवेश गरेको सन्दर्भमा सकारात्मक सोचका साथ काम गर्नु पर्नेमा उहाँले जोड दिनु भएको थियो । महिला शसक्तिकरण तथा परिवर्तनशील संस्था नेपालका अध्यक्ष संगीता भट्टराईको अध्यक्षतामा कार्यक्रम सम्पन्न भएको हो । 

 

कार्यक्रममा प्रदेश सभासदहरु रीना गुरुङ, घनश्याम दाहाल, विजय सुवेदी र प्रमुख जिल्ला अधिकारी नारायणप्रसाद भट्ट लगायतले मन्तव्य व्यक्त गर्नु भएको थियो । कार्यक्रममा के आई नेपालका इन्द्रराज भट्टराईले कार्यक्रमको उद्देश्य माथि प्रकाश पार्नु भएको थियो । कार्यक्रमका वक्ताहरुले महिला शसक्तिकरणका सवालमा हुने कार्यक्रममा चितवनलाई प्राथमिकता दिन पनि ध्यानकर्षण गराएका थिए । 

 

के आई नेपाल, चितवन सक्रिय महिला प्रतिष्ठान र महिला शसक्तिकरण तथा परिवर्तनशील संस्था नेपालको आयोजना तथा भरतपुर महानगरपालिकाको सहकार्यमा कार्यक्रम सम्पन्न भएको हो । भरतपुर महानगरपालिकाका वडाध्यक्षहरु, महिला सदस्यहरु, सेना, शसस्त्र र जनपथ प्रहरीका प्रतिनिधि, टोल बिकास संस्थाका प्रतिनिधि र सामाजिक संघसंस्थाका प्रतिनिधिहरुको कार्यक्रममा सहभागिता रहेको थियो ।

 

कार्यक्रममा सुदन ज्ञवालीले सहजीकरण गर्नु भएको थियो । सहजीकरणका क्रममा सहजकर्ता ज्ञवालीले परिवर्तनको शुरुवात आफैंबाट शुरु गर्न र महिला बेचबिखन र लैंगिक हिंसा अन्त्य गर्न आजैबाट सकारात्मक सोचका साथ काम गर्न आग्रह गर्नु भएको थियो ।