द्वारिका नेपाल, फागुन २२, भरतपुर ।

मानवताप्रेमी युवा समूहको आयोजनामा गत बुधबारबाट जारी बाल बचाउ अभियानको आज समापन भएको छ । सनराइज इङ्ग्लिस स्कुलका विद्यार्थीहरुको अगुवाइमा गत फागुन १६ गते सुरु भएको बाल बचाउ अभियानको आज एक समारोहका बीच समापन गरिएको हो । 

 

सिरियामा भएको हिँसा र बालबालिकामाथिको दुव्र्यबहारविरुद्ध चितवनका विद्यार्थीहरुले सांकेतिक रुपमा सुरु गरेको विरोध अभियानले आज एक हप्ता पूरा गरेको हो । विरोध प्रदर्शनको अन्तिम दिन आज भरतपुरका सनराइज इङ्ग्लिस स्कुल, वाल्मीकि शिक्षा सदन , स्टेप वाइ स्टेप स्कुल, बोस्टन कलेज र गैँडाकोटको अक्सफोर्ड कलेजका विद्यार्थीहरुले चौबीसकोठीबाट सुरु गरेको ¥याली भरतपुरको गेस्ट हाउस चौरमा पुगेर कोण सभामा परिणत भएको थियो । 

 

समापन कार्यक्रमको सभापति विद्यार्थी गरिमा राई, प्रमुख अतिथि जिल्ला बाल संरक्षण अधिकृत महेश पौडेल सहित समाजसेवी मञ्जुश्री खाँड, मीना खरेल, शिक्षक भूवनबन्धु अधिकारी, सञ्चारकर्मी द्वारिका नेपाल, लगायत करिब एक सय जनाले सिरियामा भएको हिँसा विरुद्ध हस्ताक्षर गरेका थिए । संकलन गरिएको हस्ताक्षर प्रमुख जिल्ला अधिकारी मार्फत नेपाल सरकारलाई बुझाइने कार्यक्रमका अगुवा अभियन्ता रोहन बगालेले बताए ।  कार्यक्रममा विभिन्न विद्यालयका बालबालिकाले सिरियामा भएको बाल हिँसा विरुद्ध आआफ्नो धारणा राखेका थिए ।