कमला गुरुङ, कालिका फागुन २०–

 

चितवन राष्ट्रिय निकुञ्ज सौराहामा अब घाइते, अपाङ्ग, विरामी तथा अशक्त वन्यजन्तुहरुको उद्दार गरी उपचार गरिने भएको छ । 

 

मध्यमवर्गीय वन्यजन्तुका निम्ति निकुञ्जमा वन्यजन्तु अस्पताल निर्माण हुँदैछ । अस्पतालको आज एक कार्यक्रमका बिच वन तथा भूसंरक्षण मन्त्री महेश आचार्यले शिलन्यास गर्नु भयो । शिलन्यास गर्दै मन्त्री आचार्यले वन्यजन्तु संरक्षणमा यस अस्पतालले महत्वपूर्ण भूमिका निर्माण गर्ने विश्वास व्यक्त गर्नु भएको छ । 

 

परस्थानीय संरक्षणमा रहेका हात्ती प्रजनन केन्द्र तथा हात्तीसार, घडियाल तथा गिद्ध प्रजनन् केन्द्र लगायत देशका अन्य केन्द्रहरुमा स्वास्थ्य सुविधा उपलब्ध गराउने अस्पतालको उद्देश्य रहेको छ । 

 

यस्तै, वन्यजन्तु सम्बन्धी विभिन्न रोग तथा स्वास्थ्य समस्या सम्बन्धमा राष्ट्रिय तथा अन्तर्राष्ट्रिय संघसस्थासंग समन्वय एवम सहकार्य गरी अध्ययन अनुसन्धान गरिनेछ । अस्पताल भवन निर्माणका लागि डेनभर जु अमेरिका र डब्लु डब्लु एफ नेपालले राष्ट्रिय प्रकृति संरक्षण कोषलाई करिब एक करोड रकम उपलब्ध गराउने प्रतिवद्धता गरेको छ । 

 

निकुञ्जमा हाल भने दुई जना डाक्टर रहेको र अस्पताल निर्माण भैसकेपछि डाक्टरहरु थपिने निकुञ्जका प्रमुख संरक्षण अधिकृत कमलजंङ्ग कुवरले बताउनु भयो । यस आर्थिक वर्षदेखि निर्माण कार्य सुरु गरी अर्को आर्थिक वर्षसम्म निर्माण कार्य पुरा गर्ने योजना रहेको कुवरले जानकारी दिनुभयो । 

 

साथै अस्पताल संचालनमा आवश्यक पर्ने उपकरण एवम् औषधीहरु विभिन्न स्रोतबाट जुटाउने सम्बन्धमा आवश्यक पहल भैरहेको निकुञ्ज विभागका महानिर्देशक टिकाराम अधिकारीले जानकारी दिनु भएको छ ।  

 

निकुञ्ज कार्यालय र कोष अन्तर्गतको जैविक विविधता संरक्षण केन्द्र सौराहाबाट संयुक्त रुपमा अस्पताल संचालन गरिनेछ भने निकुञ्ज तथा वन्यजन्तु संरक्षण विभाग र राष्ट्रिय प्रकृति संरक्षण कोषको समन्वय रहनेछ ।