रत्ननगर  चितवन, १९ फागुन । दुई पटकसम्म शून्य चोरी सिकारी वर्ष मनाएको चितवन निकुञ्जको पश्चिम सेक्टरमा आज विश्व वन्यजन्तु दिवस मनाइँदैछ । 

 

आज चितवन निकुञ्जको पश्चिम सेक्टरको मध्यवर्तीमा पर्ने अमलटारीमा दिवस मनाउन लागिएको निकुञ्जका सहायक संरक्षण अधिकृत विष्णु थपलियाले जानकारी दिनुभयो । 

 

समुदायमा आधारित चोरी सिकारी नियन्त्रण युवा जागरण राष्ट्रिय दिवससमेत आजै मनाइने चितवन निकुञ्जले जानकारी दिएको छ । 

 

यस वर्ष ‘शून्य चोरी सिकारी नेपालको पहिचान, वन्यजन्तु संरक्षण युवाको अभियान’ भन्ने नाराका साथ दिवस मनाउन लागिएको हो । 

 

सन् २०१३ डिसेम्बर २० मा संयुक्त राष्ट्रसङ्घले मार्च ३ का दिन विश्व वन्यजन्तु दिवस मनाउने निर्णय गरेको थियो । विश्वव्यापी रुपमा संरक्षणको चेतना दिई वन र वनस्पतिको संरक्षण गर्ने उक्त दिवसको मूल उद्देश्य रहेको थपलियाले बताउनुभयो । 

 

यस्तै, देशभरका युवालाई संरक्षणमा सक्रिय गराउने लक्ष्यसहित सोही अवसरमा चोरी सिकारी नियन्त्रण युवा जागरण राष्ट्रिय दिवससमेत मनाउन लागिएको चितवन निकुञ्जद्वारा जारी विज्ञप्तिमा उल्लेख छ । उक्त सम्मेलनमा चोरी सिकारी नियन्त्रणसम्बन्धी विशेष रणनीतिसमेत बनाइँदै छ । 

 

उक्त अवसरमा देशभरका युवाले चोरी सिकारी नियन्त्रणमा खेलेको भूमिका र आगामी दिनमा अपनाउनुपर्ने सावधानीका बारेमा सो क्रममा गम्भीर छलफल हुने बताइएको छ । 

 

कार्यक्रममा चोरी सिकारी नियन्त्रणमा लागेका देशभरका युवा, सामुदायिक वनका युवा प्रतिनिधि, वन तथा भूसंरक्षण मन्त्रालय एवम् निकुञ्ज विभागका संरक्षणकर्मी, मध्यवर्ती क्षेत्रका प्रतिनिधिलगायतको सहभागिता रहेको छ । 

 

सो अवसरमा विभिन्न व्यक्तिहरुलाई विशेष सम्मानसमेत गरिने निकुञ्जद्वारा जारी विज्ञप्तिमा उल्लेख छ । रासस