कमला गुरुङ, कालिका माघ १५–

 

स्थानीय स्तरमा सामाजिक उत्तरदायित्व सम्बन्धी अनुगमनकर्ताहरुका निम्ति आज देखि चितवनमा तीन दिने तालिम सुरु भएको छ । मानव अधिकार तथा सामाजिक रुपान्तरण अभियान काउराष्ट्र नेपालको केन्द्रीय कार्यक्रम अन्तर्गत सो तालिम सुरु भएको हो । 

 

मानव अधिकारको क्षेत्रमा सामाजिक न्यायका दृष्टिकोण, उत्तरदायित्वको विकास र जनताको प्रत्यक्ष र सक्रिय सहभागिता गराउनु नै तालिमको मुख्य उद्देश्य रहेको कार्यक्रम संयोजक एवम् केन्द्रीय सचिव विनोद खण्ड तिमिल्सिनाले जानकारी दिनुभएको छ । 

 

मुख्य गरी निर्माण पुर्न निर्माण परियोजना, सामाजिक सुरक्षा भत्ता वितरण, विद्यालयमा वितरण गरिने छात्रवृति सम्बन्धी अनुगमन गर्ने अनुमगनकर्ताहरुको निम्ति तालिमको आयोजना गरिएको हो । 

 

कार्यक्रममा न्यायाधिश एवम् प्रमुख अतिथि अनन्तप्रसाद डुम्रेले सामाजिक उत्तरदायित्व सम्बन्धी क्षेत्रमा भैरहेको काम निकै सराहनिय रहेको बताउनु भएको थियो ।

 

यस्तै, काउराष्ट्र नेपालका केन्द्रीय अध्यक्ष विष्णु पुकार श्रेष्ठले मानवअधिकारमा अझै दुई वटा आयाम थप गरिनुपर्ने बताउनु भएको छ । श्रेष्ठले नागरिक, राजनीतिक, आर्थिक, सामाजिक, सांस्कृतिक रहेको आयाममा विकासको अधिकार, वातारण संरक्षणको अधिकार थप गरिए मात्रै मानव अधिकार पूर्ण हुने उहाँको भनाई छ । 

 

काउराष्ट्र नेपालको कार्यक्रम अहिले ६ वटा जिल्लाहरुमा संचालन भैरहेको छ । धादिङ, प्युठान र गोरखामा कार्यक्रम संचालन भैरहेको छ भने रुपन्देही, बारा र चितवनमा कार्यक्रम थप गरिएको हो । तालिममा जम्मा ३० जना अनुमगनकर्ताहरुको सहभागिता रहेको छ ।

 

कार्यक्रममा प्रमुख जिल्ला अधिकारी डा. मान बहादुर बि.के, राष्ट्रिय सूचना आयोगका प्रतिनिधि, काउराष्ट्रका जिल्ला अध्यक्ष गोकर्ण सापकोटा लगायतको उपस्थिति रहेको थियो ।