कमला गुरुङ, कालिका माघ १५–

आफुहरुले अझै पनि उचित राहत र न्याय पाउन नसकेको भन्दै द्धन्द्ध पीडितका परिवारहरुले गुनासो गरेका छन् । 

 

न्यायका लागि द्धन्द्ध पीडित समाज चितवनले आज नारायणगढमा आयोजना गरेको अन्तरक्रिया कार्यक्रममा उनीहरुले सो गुनासो गरेका हुन् । 

 

राज्यले प्रदान गर्ने क्षतिपूर्तिको रकममा समेत विभेदकारी हुने गरेको भन्दै समानन्तर ढंगबाट क्षतिपूर्तिको रकम पाउनुपर्ने उनीहरुको माग छ । साथै उनीहरुले राजनीतिक दलहरु एकापसमा लडिरहेको अवस्थामा आफुहरुले कसरी न्याय पाउने भनेर सभाषदहरुलाई प्रश्न गरेका थिए । 

 

यस्तै, कार्यक्रममा द्धन्द्ध पीडितहरुको समस्या कसरी हल गर्न सकिन्छ भन्ने विषयमा समेत छलफल समेत भएको थियो ।

 

कार्यक्रममा सभाषद शेषनाथ अधिकारीले द्धन्द्ध पीडितहरुलाई न्याय दिलाउन आफुले सक्दो पहल गर्ने प्रतिबद्धता जनाउनु भएको छ । यस्तै कार्यक्रममा उपस्थित अन्य राजनीतिक दलका प्रतिनिधिहरुले पनि उनीहरुको पक्षमा आफुहरु सदैव रहेको बताएका छन् । 

 

कार्यक्रम समाजका अध्यक्ष निशा न्यौपानेको सभापतित्व एवम् प्रमुख जिल्ला अधिकारी डा. मान बहादुर बिकेको प्रमुख आतिथ्यतामा सम्पन्न भएको हो । 

 

कार्यक्रममा समाजका केन्द्रिय सचिव बद्री बहादुर केसी, राप्रपाका जिल्ला अध्यक्ष रामहरी कंडेल, नेकपा माओवादीका जिल्ला सेक्रेटरी अम्बिका मुडवरी लगायतको उपस्थिति रहेको थियो ।