काठमाडौं २८ फागुन । 

संविधानका विवादित बिषयमा सहमति जुटाउन प्रमुख चार राजनीतिक शक्तिको बैठक आज बस्ने भएको छ । विभिन्न तहको अनौपचारिक संवादपछि औपचारिक बैठक बस्न लागेको हो । एमाले अध्यक्ष ओलीले आफ्नो स्वास्थ्यमा थप गडबडी नभए बैठकमा सहभागी हुने जनाएका छन । 

 

सत्तापक्ष र विपक्षी मोर्चाको शनीबार बसेको बैठकले संविधानका विवादित बिषय मिलाउन चार नेतालाई जिम्मेबारी दिएको थियो । आज बैठक बस्ने तयारी भए पनि समय यकिन नभएको प्रधानमन्त्रीका प्रेस सहयोगी प्रकाश अधिकारीले जानकारी दिनुभयो । 

 

कांग्रेस सभापति एवं प्रधानमन्त्री सुशील कोइराला, एमाले अध्यक्ष ओली, एमाओवादी अध्यक्ष पुष्पकमल दाहाल र मधेशी मोर्चाका तर्फबाट मधेशी जनअधिकार फोरम ९लोकतान्त्रिक०का अध्यक्ष विजय गच्छदारलाई सहमति जुटाउन बैठकले जिम्मेबार दिएपनि त्यसयता चार नेता एकैठाउमा बसेर छलफल गर्न सकेका छैनन ।

 

एमाले अध्यक्ष ओली विरामी भएका कारण बैठक हुन नसकेको हो । मुख्य विवादित बिषयमा शासकीय स्वरुप, निर्वाचन र न्याय प्रणालीमा मोटामोटी सहमति जुटेपनि संघियताको संख्या र सिमाकंनका बिषयमा सहमति हुन सकेको छैन । कांग्रेस र एमालेले पूर्वका झापा, मोरङ, सुनसरी र पश्चिमका कैलाली कंचनपुरको सिमा सम्वन्धी विवाद सम्वन्धित क्षेत्रका बासिन्दाको जनमत मार्फत सल्टाउने विकल्प अघि सार्ने तयारी गरेका छन । त्यसप्रति विपक्षी मोर्चापनि सकारात्मक देखिएको छ ।