काठमाडौँ, २६ फागुन । राष्ट्रपति डा रामवरण यादवले आन्दोलनकारी शक्ति मिलेर सहमतिका आधारमा संविधान निर्माण गर्ने वातावरण बनाउन एकीकृत नेकपा ९माओवादी० का अध्यक्ष पुष्पकमल दाहाललाई आग्रह गर्नुभएको छ । 

 

आन्दोलनकारी शक्तिका बीचमा संवाद र सहमतिको आवश्यकता रहेकामा जोड दिँदै राष्ट्रपति डा यादवले यतिखेर आन्दोलनले कोही कसैको हित नगर्नेमा अध्यक्ष दाहाललाई सचेत गराउनुभएको थियो । 

 

राष्ट्रपति डा यादव र एमाओवादी अध्यक्ष दाहालबीच आज भएको टेलिफोन संवादमा राष्ट्रपतिले दलहरु मिलेर अगाडि बढ्नुपर्ने र त्यसमा शान्ति सम्झौताका हस्ताक्षरकर्ताको हैसियतले एमाओवादीको भूमिका महत्वपूर्ण रहेको उल्लेख गर्नुभएको थियो । 

 

“सहमतिका आधारमा संविधान निर्माण प्रक्रियालाई टुङ्गोमा पु¥याउन र वार्ता तथा संवादलाई अगाडि बढाउन राष्ट्रपतिले एमाओवादी अध्यक्षलाई आग्रह गर्नुभयो,” राष्ट्रपति र अध्यक्ष दाहालबीच भएको टेलिफोन वार्तालाई उद्धृत गर्दै एमाओवादीका केन्द्रीय सदस्यसमेत रहनुभएका अध्यक्ष दाहालका स्वकीय सचिव चुडामणि खड्काले राससलाई जानकारी दिनुभयो । 

 

सत्तारुढ दल सकारात्मक वार्ताको पक्षमा नरहेको भन्दै एमाओवादी नेतृत्वको ३० दलीय मोर्चाले आज दोस्रोचरणको आन्दोलनका कार्यक्रम सार्वजनिक गर्ने बताइरहेको बेला राष्ट्रपति डा यादव र अध्यक्ष दाहालबीच टेलिफोन वार्ता भएको हो । 

 

दलहरुबीच सार्थक संवाद हुनुपर्ने, विगतका सहमति र सम्झौतालाई कार्यान्वयन गर्नुपर्ने र सबैले अपनत्व गर्ने संविधान निर्माण हुनुपर्ने भनाइ अध्यक्ष दाहालको रहेको स्वकीय सचिव खड्काले बताउनुभयो । 

 

राष्ट्रपति डा यादवले पछिल्लो दिन दलहरुबीच संवाद सुरु भएकामा खुसी व्यक्त गर्दै निरन्तर सो प्रक्रियालाई अगाडि बढाउन र केही दिनभित्रै सहमति गर्नसमेत अध्यक्ष दाहाललाई आग्रह गर्नुभएको थियो । 

 

यसैबीच, एमाओवादी नेतृत्वको सङ्घीय लोकतान्त्रिक गठबन्धनको बैठक आजै बसी मुलुकको पछिल्लो राजनीतिक अवस्था, दलहरुबीच सुरु भएको संवाद, दोस्रोचरणको आन्दोलनलगायतका विषयमा छलफल गरिने पनि खड्काले जानकारी दिनुभयो । रासस