गोकुल बाँनीया

पोखरा, २० फागुन ।

एकीकृत नेकपा माओवादीका अध्यक्ष पुष्पकमल दाहाल प्रचण्डले संविधान निर्माणका लागि आफू र आफ्नो दल पुरै लचिलो रहेको बताएका छन् । प्रचण्डले सत्तापक्ष दलसँग वार्ता गरेर औपचारिक रुपमा सहमतिमार्फत नै संविधान निर्माणका लागि बाटो खोल्न आफू तयार रहेको बताए ।

 

कास्की जिल्ला परिषद्को बुधबार पोखरामा उद्घाटन गर्दै प्रमुख अतिथि समेत रहेका प्रचण्डले आफू र पार्टी संविधान निर्माणमा सकारात्मक रहँदा रहँदै गिभ एण्ड टेक वातावरण निर्माणका क्रममा आफूमाथि खतरा रहेको समेत स्पष्ट पारे ।

 

उनले विस्तृत शान्ति सम्झौतामार्फत सुरु यो सहकार्यलाई निरन्तरता दिने र मुलुकमा शान्ति प्रक्रियासँगै संविधान निर्माण गर्ने मुख्य दायित्व गिरिजाबाबु पछि आफ्नै भएको भन्दै यसमा आफू प्रतिबद्ध रहेको बताए । उनले आफूले बोलेर धेरै पछुतो मान्ने गरेको पनि यसरी बताए ।

 

कास्कीको समग्र विकासका लागि प्रतिबद्ध रहेको भन्दै उनले अन्तर्राष्ट्रिय विमानस्थल शिलान्यासको क्रममा रहेको र पोखरा चक्रपथको अवधारणा समेत अघि सारे ।