काठमाडौँ ,फागुन २०

व्यवस्थापिका संसद्को राज्य व्यवस्था समितिले एकीकृत नेकपा माओवादीका सभासद्हरुको अनुपस्थितिका कारण सामाजिक व्यवहार सुधार विधेयकमाथिको छलफल रोकेको छ ।

 

समितिले बुधबार विहान सिंहदरबारमा बसेको बैठकमा सत्तारुढ नेकपा एमालेका सभासद् गंगालाल तुलाधरले एमाओवादीका सभासद्को अनुपस्थितिमा छलफल अगाडि बढाउन नहुने बताएपछि विधेयकमाथिको छलफल रोकेको हो । बैठकमा विधेयकमाथि छलफलका लागि उपप्रधानमन्त्री तथा गृहमन्त्री वामदेव गौतम पनि उपस्थित हुनुहुन्थ्यो ।

 

तर एमाले सभासद् तुलाधरले विधयकमाथि एमाओवादीका सभासद्हरुले संशोधन दर्ता गरेकाले उनीहरुको अनुपस्थितिमा निर्णय गर्न नहुने बताउनुभयो ।५० सदस्यीय समितिमा एमाओवादीका ६ जना सभासद् सदस्य छन् । एमाले सभासद् तुलाधरले सरोकारवालाहरुबाट समेत सुझाव आइरहेको भन्दै उपसमिति बनाएर विधेयकमाथि पर्याप्त छलफल गरिनुपर्ने बताउनुभयो । 

 

एमाले सभासद् तुलाधरले निर्णयमा पुग्नु पहिले अधिकतम छलफलका लागि उपसमिति गठनको प्रस्ताव गरेपछि समितिको बैठक फागुन २५ गते बस्ने गरी स्थगित गरिएको छ । बैठक जम्मा ७ मिनेट बसेर स्थगित भएका कारण सभासद्हरुले विधेयकमाथि आफ्नो धारणा राख्न पाएनन् ।

 

सरकारले विधेयकमा दुलहा पक्षले दुलही पक्षसँग पौने दुई तोला सुनका गहना वा सो गहना बराबरको रकमभन्दा बढीको दाइजो लिन नपाउने र लिएको अवस्थामा दाइजो जफत गरी तीन महिनासम्म कैद सजाय गर्ने, विवाहको भोजमा तीन सय पचासभन्दा बढीलाई सहभागी गराइए ५० हजार रुपैयाँ जरिवाना गराउने व्यवस्था गर्न प्रस्ताव गरेको छ ।