काठमाडौँ, २० फागुन । संविधान निर्माणमा देखिएको गतिरोध र राजनीतिक निकासका विषयमा आज प्रधानमन्त्री सुशील कोइराला र प्रमुख प्रतिपक्षी दल एमाओवादीका अध्यक्ष पुष्पकमल दाहालबीच प्रधानमन्त्री निवास बालुवाटारमा भेटवार्ता भएको छ । 

 

गत माघ ११ गते संविधानसभाको बैठकले प्रस्ताव ९प्रश्नावली० समिति गठन गरी संविधान निर्माणको प्रक्रिया सुरु गरेपछि सत्तापक्ष र विपक्षका बीच दूरी बढे यता अध्यक्ष दाहाल आज पहिलोपटक प्रधानमन्त्री कोइरालासँग वार्ता गर्न बालुवाटार पुग्नुभएको हो । यसअघि प्रधानमन्त्री कोइरालाले गत माघ १६ गते लाजिम्पाटस्थित दाहाल निवास पुगी वार्तामा आउन आग्रह गर्नुभएको थियो । 

 

एमाओवादी नेतृत्वको मोर्चाले सहमतिका आधारमा संविधान बन्ने सुनिश्चितता नभएसम्म वार्तामा नबस्ने अडान लिइरहेका बेला प्रधानमन्त्री कोइराला र अध्यक्ष दाहालबीचको आजको भेटवार्तालाई सकारात्मक मानिएको छ । उहाँहरूले मङ्गलबार चितवनको एक सार्वजनिक कार्यक्रममा सँगै सम्बोधन गरी गतिरोध फुकाउन र सहमतिको यात्रा पुनः प्रारम्भ गर्नुपर्नेमा जोड दिनुभएको थियो । 

 

प्रधानमन्त्री कोइरालाका प्रेस सल्लाहकार प्रकाश अधिकारीले उहाँहरूबीच विद्यमान गतिरोध फुकाउने विषयमा सौहार्दपूर्ण छलफल भएको र त्यसका लागि विभिन्न विकल्पमा पनि कुराकानी भएको जानकारी दिनुभयो । 

 

मङ्गलबारमात्रै नेपाली काँग्रेस र नेकपा ९एमाले०का शीर्ष नेताबीचमा छलफलले विपक्षीसँग सघन वार्ता गर्ने र सहमति नभए संविधानसभाको स्थगन गरिएको बैठक बोलाउने निचोड निकालेको थियो । रासस