काठमाडौँ ,फागुन १९

नेकपा एमालेले आगामी जेठ महिनाभित्र संविधान जारी हुने गरी नयाँ मार्गचित्र बनाउने प्रस्ताव अगाडि सारेको  । 

 

एमालेको मंगलबार अपरान्ह पार्टी मुख्यालयमा बसेको स्थायी समितिको बैठकले संविधान निर्माणको अहिले अवरुद्ध प्रक्रिया अन्त्य गरेर जेठ महिनाभित्र संविधान जारी गर्ने मार्गचित्रको प्रस्ताव अगाडि सारेको हो ।  एमालेले जेठ महिनाभित्र  संविधान जारी गर्नका लागि एमाओवादी लगायतका विपक्षी दलहरुसँग तत्काल वार्ता गरिनुपर्ने तथा वार्ता र सहमति हुन नसके संविधानसभाको बैठक बोलाएर प्रक्रिया अगाडि बढाइनुपर्ने बताएको छ । 

 

एमालेले यस विषयमा नेपाली काँग्रेससँग गम्भिरतापूर्वक छलफल गर्ने निर्णय गरेको छ । बैठकपछि एमाले सचिव प्रदिप ज्ञवालीले संविधान निर्माणमा ढिलाइ भए सरकारको नैतिकतामाथि नै प्रश्न उब्जिने भन्दै जेठ महिनाभित्र संविधान जारी गर्ने मार्गचित्र बारेमा काँग्रेसलाई सहमत गराउने बताउनुभयो ।

 

एमाले वार्ता र सहमतिका नाममा एकीकृत नेकपा माओवादीलाई धेरै भाउ दिन नहुने पक्षमा छ । स्थायी समितिको बैठकले ८ जना वैकल्किप केन्द्रीय सदस्यको मनोनयन समेत गरेको छ । बैठकले खगेन्द्र चुडाल, देवशंकर पौडेल, मानबहादुर जिसी, रुपनारायण श्रेष्ठ, झपट रावल, प्रल्हाद गिरी, देउमान सम्बाहाम्फे र भाष्कर काफ्लेलाई वैकल्पिक केन्द्रीय सदस्यमा मनोनयन गरेको हो । 

 

सम्बाहाम्फे र काफ्ले केही समय पहिले नेकपा माले छोडेर एमाले प्रवेश गरेकाहरु हुन् भने गिरी पूर्व एमाओवादी हुन् । पार्टीको विधान अनुसार वैकल्पिक केन्द्रीय सदस्य ५ जना मात्र मनोनित गरिनुपर्ने भएपनि एमालेले अन्य पार्टी छोडेर आएकाहरुलाई स्थान दिन विधानले व्यवस्था गरेभन्दा बढीलाई मनोनित गरेको हो ।