काठमाडौँ ,फागुन १९

नेकपा माओवादीका संयोजक नेत्रविक्रम चन्दले जनतालाई अधिकार सम्पन्न नबनाइए तथा तत्कालिन जनयुद्धका घाइते र सहिद परिवारलाई राहत नदिइए युद्ध गर्ने चेतावनी दिनुभएको छ । 

 

अखिल नेपाल जनसांस्कृतिक महासंघले मंगलबार काठमाडौमा गरेको कार्यक्रममा नेकपा माओवादीका संयोजक चन्दले जनतालाई अधिकार सम्पन्न बनाउन पूरै शक्ति प्रयोग गर्ने र राज्यले दमन गरे युद्धमा जाने चेतावनी दिनुभयो । उहाँले नेपाली काँग्रेस र नेकपा एमालेले शक्तिमा आएपछि माओवादीमाथि आतंककारीको जस्तो व्यवहार गर्न थालेको भन्दै आफ्नो पार्टीले लाचार र मूल्यहिन तथा लास जस्तो भएर नसहने बताउनुभयो ।

 

माओवादीका संयोजक चन्दले शान्ति प्रक्रिया भन्दा संविधान निर्माणको काम कम महत्वको भएको भन्दै संविधान निर्माणमा भन्दा युद्ध गर्नुपर्ने अवस्था किन आयो भन्ने विषयमा वहस गरिनुपर्ने बताउनुभयो । उहाँले संविधानसभाको तत्काल विघटन गरेर आफ्नो पार्टीलाई राज्यसत्तामा सहभागी गराउन माग गर्नुभयो । उहाँले माओवादीले भिखारी बन्नका लागि नभइ राज्यसत्ता प्राप्तिका लागि नै दश वर्षसम्म जनयुद्ध गरेको बताउनुभयो । 

 

माओवादीका संयोजक चन्दले राजनीतिक परिवर्तन र जनताको अधिकारका लागि माओवादीले सबैभन्दा बढी योगदान गरेको भन्दै हत्या हिंसाको आरोपमा माओवादी नेताहरुमाथि कारवाही गरिएको अवस्थामा काँग्रेस र एमालेका नेतालाई पनि बाँकि राख्न नमिल्ने बताउनुभयो । उहाँले काँग्रेस र एमालेले राज्यसत्तामा वसेर जनतालाई दमन गरेकै कारण आफूहरुले जनयुद्ध गर्नुपरेको बताउनुभयो ।